சர்வஜன வாக்கெடுப்பு தோல்வி: பாதுகாப்பை பலப்படுத்த மாற்றுவழி தேடுகிறது ஐஸ்லாந்து

ஐரோப்பிய ஒன்றியத்தில் (EU) இணைவது தொடர்பான பேச்சுவார்த்தைகளை மீண்டும் தொடங்குவதற்கு மக்கள் வாக்கெடுப்பில் எதிர்ப்பு தெரிவிக்கப்பட்டுள்ளதைத் தொடர்ந்து, நாட்டின் பாதுகாப்பை பலப்படுத்துவதற்குப் புதிய வழிகளைக் கண்டறிய வேண்டிய கட்டாயம் ஏற்பட்டுள்ளதாக ஐஸ்லாந்து வெளியுறவு அமைச்சர் தோர்கெர்டூர் குன்னார்ஸ்டோட்டிர் (Thorgerdur Gunnarsdottir) தெரிவித்துள்ளார்.

இதற்காக இருதரப்பு ஒப்பந்தங்களை மேற்கொள்வது மற்றும் ஐரோப்பிய ஒன்றியத்துடனான உறவுகளை மேலும் ஆழப்படுத்துவது ஆகிய விருப்பங்கள் பரிசீலிக்கப்படும் என்றும் அவர் குறிப்பிட்டார்.

ஐரோப்பிய ஒன்றியத்தில் இணைவது தொடர்பான பேச்சுவார்த்தைகளை மீண்டும் நடத்துவதற்கு அரசாங்கம் முன்வைத்த கோரிக்கையை சனிக்கிழமை நடைபெற்ற பொது வாக்கெடுப்பில் ஐஸ்லாந்து மக்கள் நிராகரித்தனர். இதனைத் தொடர்ந்து வெளியுறவு விவகாரக் குழுவைச் சந்தித்த பின்னர் பாராளுமன்றத்தில் வைத்து அமைச்சர் தனது கருத்துக்களைப் பகிர்ந்துகொண்டார்.

சுமார் 400,000 மக்கள் தொகையைக் கொண்ட ஆர்க்டிக் தீவு நாடான ஐஸ்லாந்து, நேட்டோ அமைப்பில் உறுப்பினராக உள்ள போதிலும், அதற்குச் சொந்தமாக நிலையான இராணுவம் எதுவும் இல்லை.

1951 ஆம் ஆண்டு அமெரிக்காவுடன் செய்துகொண்ட இருதரப்பு பாதுகாப்பு ஒப்பந்தம் மற்றும் நேட்டோ உறுப்பினர் அந்தஸ்து ஆகியவற்றையே அந்நாடு தனது பாதுகாப்பிற்கு முழுமையாக நம்பியுள்ளது.

சனிக்கிழமை நடைபெற்ற வாக்கெடுப்பில், பிரஸ்ஸல்ஸுடன் (Brussels) பேச்சுவார்த்தை நடத்துவதற்கான அரசாங்கத்தின் முன்மொழிவுக்கு எதிராக 52.8% வாக்குகளும், ஆதரவாக 47.2% வாக்குகளும் பதிவாகின. இதில் தகுதியுள்ள வாக்காளர்களில் 82.5% பேர் பங்கேற்றனர்.

ஐஸ்லாந்து 1994 ஆம் ஆண்டு முதல் ஐரோப்பிய பொருளாதாரப் பகுதியில் (EEA) அங்கமாக இருந்து வருகிறது. இந்த ஒப்பந்தம் முழுமையான உறுப்பினர் அந்தஸ்தை வழங்காவிட்டாலும், ஐரோப்பிய ஒன்றியத்தின் ஒற்றைச் சந்தையை அணுக ஐஸ்லாந்திற்கு அனுமதியளிக்கிறது.

“ஐரோப்பிய பொருளாதாரப் பகுதிக்குள்ளான ஒத்துழைப்பை நாம் மேலும் பலப்படுத்த வேண்டும். இந்த வாக்கெடுப்பின் நேர்மறையான அம்சம் என்னவென்றால், ஐஸ்லாந்தின் அனைத்து அரசியல் கட்சிகளும் இப்போது EEA ஒப்பந்தத்திற்கு ஆதரவாக ஒன்றாக இணைந்துள்ளன” என்றும் வெளியுறவு அமைச்சர் சுட்டிக்காட்டினார்.