28 ஆண்டுகள் காத்திருப்பு – சாதித்து காட்டிய Norway

28 ஆண்டுகளுக்குப் பிறகு உலகக் கோப்பை கால்பந்து திருவிழாவிற்குத் திரும்பியுள்ள Norway அணி, தனது முதல் லீக் ஆட்டத்தில் ஈராக் அணியை 4-1 என்ற கோல் கணக்கில் வீழ்த்தி அபார வெற்றி பெற்றுள்ளது.

பாஸ்டன் நகரில் நடைபெற்ற இந்த ஆட்டத்தில், மான்செஸ்டர் சிட்டி அணியின் நட்சத்திர வீரர் எர்லிங் ஹாலண்ட் (Erling Haaland) உலகக் கோப்பையில் தனது அறிமுக ஆட்டத்திலேயே இரட்டை கோல்கள் அடித்து முத்திரை பதித்துள்ளார்.

ஹாலண்டின் அசாத்திய சாதனை

இந்த இரட்டை கோல்களின் மூலம், எர்லிங் ஹாலண்ட் சர்வதேச கால்பந்து அரங்கில் வெறும் 51 போட்டிகளில் விளையாடி 57 கோல்களைக் கடந்து சாதனை படைத்துள்ளார்.

Norway அணி கடைசியாக 1998 உலகக் கோப்பையில் விளையாடியிருந்தது.

தற்போதைய பயிற்சியாளர் ஸ்டேல் சோல்பாக்கன் (Stale Solbakken) அன்று வீரராக களம் கண்டு பிரேசிலை வீழ்த்திய அணியில் இடம் பெற்றிருந்தார்.

தற்போது ஹாலண்ட், ஒடேகார்ட் போன்ற “தங்கத் தலைமுறை” (Golden Generation) வீரர்களின் உதவியோடு வட அமெரிக்க மண்ணில் புதிய வரலாறு படைக்க Norway காத்துள்ளது.

ஈராக்கின் கடினமான பயணம்

மறுபுறம், 1986-க்குப் பிறகு முதல்முறையாக உலகக் கோப்பைக்குத் தகுதி பெற்றுள்ள ஈராக் அணி, இதற்காக 867 நாட்கள், 21 போட்டிகள் என மிக நீண்ட கடினமான தகுதிச்சுற்றுப் பாதையைக் கடந்து வந்துள்ளது.

அமெரிக்கா வந்தடைந்த போது ஈராக் வீரர் ஹுசைன் குடிவரவு அதிகாரிகளால் பல மணிநேரம் விசாரணைக்குள்ளாக்கப்பட்டார் என்பதும் குறிப்பிடத்தக்கது.

இந்த வெற்றியைத் தொடர்ந்து, ‘குரூப் I’ பிரிவில் Norway அணி சிறந்த கோல் வித்தியாச அடிப்படையில் (Goal Difference) 3 புள்ளிகளுடன் முதலிடத்தில் உள்ளது.

இதே பிரிவில் செனகல் அணியை 3-1 என வீழ்த்திய பிரான்ஸ் அணியும் 3 புள்ளிகளுடன் சமநிலையில் உள்ளது.

Norway அணி தனது அடுத்த பலப்பரீட்சையை ஆப்பிரிக்காவின் வலிமைமிக்க செனகல் அணியுடன் வரும் ஜூன் 22 அன்று நியூ ஜெர்சியில் எதிர்கொள்ளவுள்ளது.