விடைபெறுகிறார் இங்கிலாந்து கிரிக்கெட் அணி நட்சத்திரம்

சர்வதேச கிரிக்கெட்டிலிருந்து ஓய்வு பெறுவதாக இங்கிலாந்து அணியின் தலைவர் பென் ஸ்டோக்ஸ் (Ben Stokes) அறிவித்துள்ளார்.

நியூசிலாந்து அணிக்கு எதிரான தீர்க்கமான மூன்றாவது டெஸ்ட் போட்டி நடந்துவரும் நிலையிலேயே அவர் இந்த அறிவிப்பை வெளியிட்டுள்ளார்.

“இங்கிலாந்து அணியின் கேப்டனாகவும், இங்கிலாந்து நாட்டைப் பிரதிநிதித்துவப்படுத்தியும் நான் விளையாடும் கடைசி இரண்டு நாட்கள் இதுவே” என்று Ben Stokes கூறியுள்ளார்.

தற்போது மூன்று போட்டிகள் கொண்ட இந்த டெஸ்ட் தொடர் 1-1 என்ற கணக்கில் சமநிலையில் உள்ளதால், திங்கள்கிழமை நடைபெறும் 5-ஆம் மற்றும் இறுதி நாள் ஆட்டத்தின் மீதே தொடரின் வெற்றி யாருக்கு என்பது தீர்மானிக்கப்படும்.

இந்த அதிர்ச்சியூட்டும் அறிவிப்பு ஞாயிற்றுக்கிழமை தேநீர் இடைவேளைக்கு (Tea break) 15 நிமிடங்களுக்கு முன்பு வெளியானது.

அறிவிப்பு வெளியான சில நிமிடங்களிலேயே ஸ்டோக்ஸ் ஒரு முக்கிய விக்கெட்டை வீழ்த்தினார்.

மேலும் அந்த செஷன் முடிந்து அவர் இங்கிலாந்து அணியை மைதானத்திலிருந்து வழிநடத்திச் சென்றபோது, மைதானத்தில் இருந்த ஒட்டுமொத்த ரசிகர்களும் எழுந்து நின்று அவருக்குத் தங்கள் மரியாதையைச் செலுத்தினர்.

உலகப் புகழ்பெற்ற கிரிக்கெட் வீரர்களில் ஒருவரான 35 வயது ஸ்டோக்ஸ், கடந்த 15 ஆண்டுகளாக இங்கிலாந்து அணிக்காக விளையாடி வருகிறார்.

அவரது கிரிக்கெட் வாழ்க்கையின் உச்சக்கட்டமாக, 2019 ஆம் ஆண்டு லார்ட்ஸ் (Lord’s) மைதானத்தில் நியூசிலாந்துக்கு எதிராக நடைபெற்ற 50 ஓவர் உலகக் கோப்பை இறுதிப் போட்டியில் இங்கிலாந்து அணி த்ரில் வெற்றி பெற்று சாம்பியன் பட்டம் வெல்ல அவர் முக்கிய காரணமாக அமைந்தார்.

மேலும், 2022 ஆம் ஆண்டு இங்கிலாந்து அணி T20 உலகக் கோப்பையை வென்றபோதும் அவர் ஒரு முக்கிய வீரராகத் திகழ்ந்தார். அதே ஆண்டில் தான் அவர் இங்கிலாந்து டெஸ்ட் அணியின் கேப்டனாகவும் பொறுப்பேற்றார்.