பாகிஸ்தானின் தேசிய விமான நிறுவனம் திவாலாகும் நிலை!!! தனியார்மயமாக்க அவசர உத்தரவு

பொருளாதார நெருக்கடியில் சிக்கித் தவிக்கும் அண்டை நாடான பாகிஸ்தானுக்கு ஏற்பட்டுள்ள பிரச்னைகள் குறைவதற்கான அறிகுறியே தெரியவில்லை.

நஷ்டத்தில் இயங்கி வரும் பாகிஸ்தான் இன்டர்நேஷனல் ஏர்லைன்ஸின் (PIA) ஐந்து போயிங்-777 விமானங்கள் தரையிறக்கப்பட்டுள்ளன. அவற்றில் இன்ஜின் இல்லாததால் இந்த நடவடிக்கை எடுக்கப்பட்டுள்ளது.

பாகிஸ்தானின் ஆர்யா செய்தியின் அறிக்கையின்படி, ஐந்து விமானங்களில் இரண்டு இப்போது நிரந்தரமாக தரையிறக்கப்பட்டுள்ளன. அவை மீண்டும் பறக்காது என தெரிவிக்கப்பட்டுள்ளது.

மொத்தமுள்ள 12 விமானங்களில் ஏழு விமானங்கள் மட்டுமே தற்போது இயங்கி வருவதாக அந்த அறிக்கை கூறுகிறது. மற்றொன்று சவூதி அரேபியாவின் துறைமுக நகரமான ஜெட்டாவில் பழுதடைந்து கிடக்கிறது.

பாகிஸ்தானின் அரசு விமான நிறுவனங்களுக்கு பராமரிப்புக்காக 60 மில்லியன் டொலர்கள் தேவைப்படுகிறது.

இந்த விஷயத்தின் தீவிரத்தைக் கண்டு, பாக்கிஸ்தான் இன்டர்நேஷனல் ஏர்லைன்ஸ் நிறுவனத்தை தனியார்மயமாக்கும் செயல்முறையை விரைவுபடுத்துமாறு விமானப் போக்குவரத்து அமைச்சருக்கு உத்தரவிடப்பட்டுள்ளது.

இஸ்லாமாபாத்தில் இது தொடர்பான மறுஆய்வு கூட்டத்திற்கு தலைமை தாங்கிய பிரதமர் கக்கர், அனைத்து பங்குதாரர்களும் பாகிஸ்தான் சர்வதேச விமான நிறுவனத்தை அதன் தரநிலைகளின்படி தனியார்மயமாக்கும் செயல்முறையை விரைவுபடுத்த வேண்டும் என்றார்.

இதற்கு உடனடியாக தீர்வு காண வேண்டும். இது தொடர்பாக விமான போக்குவரத்து துறை அமைச்சர் செய்து வரும் பணிகளை பாராட்டினார்.

பாகிஸ்தான் இன்டர்நேஷனல் ஏர்லைன்ஸின் செயல்பாடுகளில் தொடர்ச்சியான இழப்புகளைக் கருத்தில் கொண்டு, பாகிஸ்தான் ஏற்கனவே பல சர்வதேச மற்றும் உள்நாட்டு விமானங்களை ரத்து செய்துள்ளது.