ரூஹுணு(Ruhuna) பல்கலைக்கழகத்தில் இரு குழுக்களிடையே மோதல்: 6 மாணவர்கள் படுகாயம், 20 பேர் கைது

ரூஹுணு(Ruhuna) பல்கலைக்கழகத்தின் விவசாயப் பீடத்தில் இரண்டு மாணவர் குழுக்களுக்கு இடையில் நடந்த கடும் மோதலில் ஆறு மாணவர்கள் காயமடைந்து வைத்தியசாலையில் அனுமதிக்கப்பட்டுள்ளனர்.

இந்தச் சம்பவம் தொடர்பாக 20 மாணவர்கள் கைது செய்யப்பட்டுள்ளதாக காவல்துறை தெரிவித்துள்ளது.

பல்கலைக்கழக வளாகத்திற்குள் நடந்த இந்தத் திடீர் மோதல் காரணமாக அங்கு பெரும் பதற்றம் ஏற்பட்டது. காயமடைந்த மாணவர்கள் உடனடியாக வைத்தியசாலையில் சிகிச்சைக்காகச் சேர்க்கப்பட்டனர்.

நிலைமையைக் கட்டுக்குள் கொண்டுவரும் முன்னெச்சரிக்கை நடவடிக்கையாக, பல்கலைக்கழக நிர்வாகம் உடனடியாக இரண்டாம் மற்றும் மூன்றாம் ஆண்டு மாணவர்களை பீட வளாகத்தை விட்டு வெளியேறுமாறு உத்தரவிட்டுள்ளது.

இந்த மோதலுக்கான உண்மையான காரணம் என்ன, இதற்குப் பின்னணியில் யார் உள்ளனர் என்பதைக் கண்டறியும் விரிவான விசாரணைகளை காவல்துறை மேற்கொண்டு வருகிறது.

இந்த மோதல் சம்பவம், பல்கலைக்கழகத்தின் கல்விச் சூழல் மற்றும் பாதுகாப்பு குறித்த தீவிர கேள்விகளை எழுப்பியுள்ளது.