ஈரான்மீதான தடைகள் மீண்டும் அமுல்

ஹார்முஸ் நீரிணையில் கப்பல்கள் மீது ஈரான் நடத்திய தாக்குதல்கள் முற்றிலும் ஏற்றுக்கொள்ள முடியாதவை என்றும், இதற்கான விளைவுகளை ஈரான் சந்திக்க நேரிடும் என்றும் அமெரிக்க அதிகாரி ஒருவர் எச்சரித்ததைத் தொடர்ந்து, ஈரான் எண்ணெய் மீதான தடைகளை அமெரிக்கா செவ்வாய்க்கிழமை மீண்டும் அமுல்படுத்தியுள்ளது.

அமெரிக்காவின் இந்த அறிவிப்பைத் தொடர்ந்து உலக சந்தையில் கச்சா எண்ணெய் விலை 5 சதவீதத்திற்கும் அதிகமாக உயர்ந்துள்ளது.

வாஷிங்டன் மற்றும் தெஹ்ரான் இடையே எட்டப்பட்ட தற்காலிக உடன்படிக்கையின் ஒரு பகுதியாக, ஈரானின் எண்ணெய் விற்பனைக்கு எதிர்வரும் ஆகஸ்ட் 21ஆம் தேதி வரை அமெரிக்க நிதி அமைச்சகம் கடந்த மாதம் அனுமதி வழங்கியிருந்தது.

ஆனால், செவ்வாய்க்கிழமை இந்த அனுமதி ரத்து செய்யப்பட்டதன் மூலம், அந்த அவகாசம் ஜூலை 17ஆம் திகதியுடன் முடிவுக்குக் கொண்டு வரப்பட்டுள்ளது.

ஹோர்முஸ் நீரிணையிலும் அதன் அருகாமையிலும் கடந்த சில நாட்களில் மூன்று எண்ணெய் டாங்கர் கப்பல்கள் அடையாளம் தெரியாத ஏவுகணைகளால் தாக்கப்பட்டதாக பிரிட்டிஷ் கடற்படையுடன் இணைந்த ‘யுகேஎம்டிஓ’ (UKMTO) அமைப்பு அறிக்கை வெளியிட்டதைத் தொடர்ந்தே அமெரிக்கா இந்த நடவடிக்கையை எடுத்துள்ளது.

எனினும், இத்தாக்குதல்கள் குறித்து தெஹ்ரான் உடனடியாக எந்தக் கருத்தும் தெரிவிக்கவில்லை, தாக்குதலுக்கு யாரும் பொறுப்பேற்கவும் இல்லை.

தற்போதைய பதற்றமான சூழல் நிலவியபோதிலும், ஈரானுடன் ஒரு இறுதி உடன்பாட்டை எட்டுவதற்காக அமெரிக்கப் பேச்சுவார்த்தையாளர்கள் தொடர்ந்து நல்லெண்ணத்துடன் பணியாற்றி வருவதாக அமெரிக்க அதிகாரி ஒருவர் தெரிவித்தார்.

இருப்பினும், இந்தத் தாக்குதல்களும் அதற்கு அமெரிக்கா அளித்துள்ள பதிலும் வாஷிங்டன் – தெஹ்ரான் இடையிலான இராஜதந்திரப் புரிதலை ஆபத்தான நிலைக்குத் தள்ளியுள்ளதுடன், அடுத்தடுத்து மேற்கொள்ளப்படும் பழிவாங்கும் நடவடிக்கைகள் பரந்த அளவிலான இறுதிப் பேச்சுவார்த்தையைப் பாதிக்கலாம் என்ற அச்சத்தையும் ஏற்படுத்தியுள்ளது.