இங்கிலாந்தில் ஆதரவு இல்லங்களில் தொடரும் மரணங்கள்: புதிய சட்டத்தை அமல்படுத்தக் கோரிக்கை

இங்கிலாந்தில் பாதுகாப்பு மற்றும் முறையான வசதிகள் இல்லாத ‘ஆதரவு இல்லங்களில்’ தங்கியிருக்கும் எளிய மக்கள் உயிரிழக்கும் அவலம் தொடர்ந்து வருகிறது.

இத்தகைய இல்லங்களை ஒழுங்குமுறைப்படுத்த இரண்டு ஆண்டுகளுக்கு முன்பே சட்டம் கொண்டுவரப்பட்ட போதிலும், அது இன்னும் முழுமையாக அமல்படுத்தப்படாததே இந்த நிலைக்குக் காரணம் எனப் புகார் எழுந்துள்ளது.

சிறையிலிருந்து விடுதலையானவர்கள் மற்றும் மனநலம் பாதிக்கப்பட்டோருக்காக ஒதுக்கப்படும் இந்த இல்லங்களைச் சில நில உரிமையாளர்கள் முறைகேடாகப் பயன்படுத்தி கோடிக்கணக்கில் லாபம் ஈட்டி வருவதாகக் கூறப்படுகிறது.

அங்கு போதிய பராமரிப்பு இன்றி, எலிகள் மற்றும் பூஞ்சைத் தொற்றுகளால் மக்கள் பாதிக்கப்படுவதாகவும், 2024-ஆம் ஆண்டில் மட்டும் இதுவரை 36 பேர் உயிரிழந்துள்ளதாகவும் ஆய்வுகள் தெரிவிக்கின்றன.

இந்நிலையில், இந்தச் சட்டத்தை அடுத்த மாதம் முதல் அமல்படுத்தப்போவதாக அரசாங்கம் தற்போது உறுதியளித்துள்ளது.

இதன் மூலம் உரிமம் வழங்குதல் மற்றும் குறைந்தபட்சத் தரக் கட்டுப்பாடுகள் கொண்டுவரப்பட்டு, பாதிக்கப்படக்கூடிய எளிய மக்களின் பாதுகாப்பு உறுதி செய்யப்படும் என எதிர்பார்க்கப்படுகிறது.