ட்ரம்ப்பை சந்தித்தார் ஈராக் பிரதமர்: பொருளாதார உறவை வலுப்படுத்த திட்டம்

அமெரிக்க ஜனாதிபதி டொனால்ட் ட்ரம்பும், ஈராக் பிரதமர் அலி அல்-ஜைதியும் (Ali al-Zaidi) வாஷிங்டனில் உள்ள வெள்ளை மாளிகையில் சந்தித்துப் பேசினர்.

இச்சந்திப்பின் போது இரு நாடுகளுக்கும் இடையிலான பொருளாதார உறவுகளை ஆழப்படுத்தவும், ஈராக்கின் எண்ணெய் உற்பத்தியை அதிகரிக்கவும் இரு தலைவர்களும் உறுதிபூண்டனர்.

அரசியல் பின்னணி இல்லாத தொழிலதிபரான அல்-ஜைதிக்கு ட்ரம்ப் தனது ஆதரவை வழங்கியதை அடுத்து இந்தச் சந்திப்பு நடந்துள்ளது.

முன்னதாக, ஈரானுடன் நெருங்கிய தொடர்பு கொண்டிருந்ததாகக் கருதப்படும் ஈராக்கின் முன்னாள் பிரதமர் நூரி அல்-மாலிகி (Nouri al-Maliki) மீண்டும் பிரதமர் பதவிக்கு வருவதை ட்ரம்ப் பகிரங்கமாக எதிர்த்தார்.

அதன் விளைவாக, கடந்த ஏப்ரல் மாதம் அல்-மாலிகி போட்டிப் பந்தயத்தில் இருந்து விலகினார்.

பொருளாதார மற்றும் எண்ணெய் ஒப்பந்தங்கள்

அல்-ஜைதியின் இந்த அமெரிக்கப் பயணத்தின் போது பல எண்ணெய் மற்றும் எரிவாயு ஒப்பந்தங்கள் கையெழுத்தாகும் என்று ஈராக் அரசு ஏற்கனவே தெரிவித்திருந்தது.

ஓவல் அலுவலக (Oval Office) சந்திப்பின் போது ட்ரம்பும் பல ஒப்பந்தங்களை உறுதிசெய்தார்.

அல்-ஜைதியை “ஒரு அற்புதமான புதிய சாம்பியன்” என்று பாராட்டிய ட்ரம்ப், “ஈராக்கிற்கு எண்ணெய் வளம் காரணமாக மிகப்பெரிய ஆற்றல் உள்ளது. நாம் பல ஒப்பந்தங்களைச் செய்யப் போகிறோம். இது இரு நாடுகளிலும் பல வேலைவாய்ப்புகளை உருவாக்கும்” என்று கூறினார்.

இந்த விஜயம் மற்ற பயணங்களைப் போன்றது அல்ல என்று குறிப்பிட்ட பிரதமர் அல்-ஜைதி, இது ஒரு “பொருளாதார கூட்டாண்மையின்” தொடக்கம் என்றார்.

அமெரிக்க-ஈராக் உறவுகள் இராணுவ அடிப்படையிலிருந்து பொருளாதார அடிப்படையிலானதாக மாறி வருவதாக அவர் குறிப்பிட்டார்.

ஈராக்கில் தற்போது எஞ்சியிருக்கும் (2,000-க்கும் குறைவான) அமெரிக்கப் படைகள் அனைத்தும் வரும் செப்டம்பர் 30-க்குள் ஈராக்கிலிருந்து முழுமையாக வெளியேறும் என்று ட்ரம்பும் அல்-ஜைதியும் தெரிவித்தனர்.

அதே திகதிக்குள் ஈராக்கில் செயல்படும் ஆயுதக் குழுக்களும் தங்களின் ஆயுதங்களைக் கைவிட வேண்டும் என்று அல்-ஜைதி உறுதியளித்துள்ளார்.