இலங்கையில் நீட்டிக்கப்படும் பாடசாலை நேரம் – ஆசிரியர் சங்கம் விடுத்துள்ள எச்சரிக்கை!

இலங்கையில் அடுத்த ஆண்டு (2026) ஜனவரி மாதம் முதல் பாடசாலை நேரத்தை பிற்பகல் 2 மணி வரை நீட்டிக்கும் முடிவில் எந்த மாற்றமும் இருக்காது என்று கல்வி அமைச்சகம் மீண்டும் வலியுறுத்தியதை அடுத்து, இலங்கை ஆசிரியர் சங்கம் (CTU) முன்மொழியப்பட்ட நடவடிக்கைக்கு எந்த சூழ்நிலையிலும் உடன்படப் போவதில்லை என்று தெரிவித்துள்ளது.

இது தொடர்பில் கருத்து வெளியிட்டுள்ள ஆசிரியர் சங்கத்தின் தலைவர் பிரியந்த பெர்னாண்டோ, கல்விப் பொதுச் சான்றிதழ் உயர்தர  தேர்வுக்குப் பிறகு பாடசாலைகள் மீண்டும் திறக்கப்படும்போது, ​​ஆசிரியர்கள் ஒரு நாள் வேலைநிறுத்தத்தில் ஈடுபடுவார்கள் என்று கூறினார்.

“இதை உடனடியாக திரும்பப் பெறுமாறு நாங்கள் அரசாங்கத்திடம் கேட்டுக்கொள்கிறோம். இது எந்தவொரு உளவியல் அல்லது கல்வி ஆய்வின் அடிப்படையிலும் எடுக்கப்பட்ட முடிவு அல்ல.

எனவே, பாடசாலை நேரத்தை பிற்பகல் 2 மணி வரை நீட்டிக்கும் முடிவை உடனடியாக திரும்பப் பெற வேண்டும்.  எந்தவொரு காரணத்திற்காகவும் இந்த திட்டத்திற்கு ஆசிரியர் சங்கம் உடன்படாது என்றாலும், அதிகாரிகளுடன் கலந்துரையாடல்களை நடத்தத் தயாராக இருப்பதாகவும் அவர் கூறினார்.

“இது திரும்பப் பெறப்படாவிட்டால், நாங்கள் தொடர்ச்சியான தொழிற்சங்க நடவடிக்கைகளை எடுப்போம் என்றும் அவர் வலியுறுத்தியுள்ளார்.