ரொனால்டோவுக்கு ஏமாற்றம்: வெளியேறியது போர்த்துகள்

டல்லாஸில் நடைபெற்ற பரபரப்பான ஆட்டத்தில் ஸ்பெயின் வீரர் மைக்கேல் மெரினோ கடைசி நிமிடத்தில் அடித்த கோலால் போர்த்துகள் அணி 1-0 எனத் தோல்வியடைந்து வெளியேறியது.

இதன் மூலம் போர்த்துகள் முன்னணி வீரர் கிறிஸ்டியானோ ரொனால்டோவின் கடைசி உலகக் கோப்பை பயணம் ஏமாற்றத்துடன் முடிவடைந்தது.

எனினும், தனது சர்வதேச கால்பந்து எதிர்காலம் குறித்து அவசரப்பட்டு எந்தவொரு முடிவையும் எடுக்க அவர் தயாராக இல்லை.

திங்கள்கிழமையன்று ‘மிக்ஸட் ஜோன்’ (Mixed Zone) பகுதியில் செய்தியாளர்களிடம் பேசிய ரொனால்டோ, மாற்று வீரராக களம் புகுந்த மெரினோ கடைசி தருணத்தில் கோல் அடித்ததற்கு ஸ்பெயின் அணிக்கு “சிறிது அதிர்ஷ்டம்” இருந்தது என்றும், இந்த ஆட்டம் எந்தப் பக்கம் வேண்டுமானாலும் திரும்பியிருக்கலாம் என்றும் குறிப்பிட்டார்.

“உலகக் கோப்பையிலிருந்து இந்த முறையில் வெளியேறுவது எனக்கு வருத்தமளிக்கிறது,” என்று அவர் கூறினார்.

“நான் எனது முழு திறமையையும் வெளிப்படுத்தினேன். எனது சிறந்த பங்களிப்பை அளித்துள்ளேன், ஒரு தெளிவான மனசாட்சியுடன் நான் வெளியேறுகிறேன்.

ஆம், இதுவே எனது கடைசி உலகக் கோப்பை, ஆனால் இப்போது நான் சிந்திப்பதற்கும் எனது குடும்பத்தினருடன் நேரத்தைச் செலவிடுவதற்கும் எனக்கு அவகாசம் கிடைக்கும். நான் அவசரப்பட்டு எந்தவொரு முடிவையும் எடுக்க மாட்டேன்.”

போர்ச்சுகல் அணிக்காகத் தனது கடைசிப் போட்டியில் விளையாடிவிட்டாரா என்பதை உறுதிப்படுத்திக் கூற மறுத்த 41 வயதான ரொனால்டோ, தனது தனிப்பட்ட முடிவு அணியின் பயணத்தை நிழலிட (பாதிக்க) தான் விரும்பவில்லை என்று கூறினார்.

“நான் உணர்ச்சிவசப்பட்டு எந்தவொரு முடிவையும் எடுப்பதில்லை,” என்றார் அவர்.

2016 ஐரோப்பிய சாம்பியன்ஷிப் (Euro 2016) மற்றும் 2019, 2025 ஆகிய ஆண்டுகளில் நேஷன்ஸ் லீக் பட்டங்களை போர்த்துகள் வெல்ல உதவிய ரொனால்டோ, தேசிய அணிக்கான தனது பங்களிப்பைக் குறித்து பெருமைப்படுவதாகக் கூறினார்.

“தேசிய அணி இதுவரை வென்றதில் மிகப்பெரிய பட்டம் 2016 ஐரோப்பிய சாம்பியன்ஷிப் ஆகும். உண்மையைச் சொல்வதானால், அது எனக்கு ஒரு உலகக் கோப்பைக்கு இணையான முக்கியத்துவம் வாய்ந்தது.”

போர்த்துகள் அணியின் இந்த வெளியேற்றத்துடன் அதன் பயிற்சியாளர் ரொபெர்டோ மார்டினெஸும் தனது பதவியில் இருந்து விலகியுள்ளார். அவருக்காக ரொனால்டோ சில நெகிழ்ச்சியான வார்த்தைகளைப் பகிர்ந்துகொண்டார்.