விண்வெளிப் போட்டியில் சீனா சாதனை

மறுபயன்பாட்டு ராக்கெட் தொழில்நுட்பத்தில் (Reusable rockets) அமெரிக்காவின் ஆதிக்கத்தை முறியடிக்கும் நோக்கில், கடல் தளத்தில் அமைக்கப்பட்ட வலை (Net) மூலம் சோதனை ரீதியிலான ராக்கெட் மீட்பு அமைப்பை சீனா வெற்றிகரமாகச் சோதித்துள்ளதாக அந்நாட்டு அரசு ஊடகங்கள் தெரிவித்துள்ளன.

வெள்ளிக்கிழமை சீனாவின் தெற்குப் பகுதியில் உள்ள ஹைனான் (Hainan) வணிக விண்வெளி ஏவுதளத்தில் இருந்து ‘லாங் மார்ச் 10B’ (Long March 10B) ராக்கெட் ஏவப்பட்டது.

அதன் பூஸ்டர் (Booster) மற்றும் மேல் அடுக்கு பிரிந்த சுமார் ஆறு நிமிடங்களுக்குப் பிறகு, அந்த பூஸ்டர் செங்குத்தாகத் திரும்பி வந்து கடலில் இருந்த தளத்தில் வெற்றிகரமாக மீட்டெடுக்கப்பட்டது.

சீனா சுற்றுப்பாதை அளவிலான (Orbital-class) ராக்கெட் ஒன்றை வெற்றிகரமாக மீட்டெடுப்பது இதுவே முதல் முறையாகும். இந்த சோதனை, மறுபயன்பாட்டு ராக்கெட்டுகளை உருவாக்கும் இலக்கிற்கு சீனாவை இன்னும் நெருக்கமாகக் கொண்டு சென்றுள்ளது.

இந்தச் செய்தியைத் தொடர்ந்து சீன விண்வெளி நிறுவனங்களின் பங்குகள் கணிசமாக உயர்ந்தன. குறிப்பாக ‘சீனா ஸ்பேஸ்சாட்’ (China Spacesat) மற்றும் ‘சீனா சாட்டிலைட் கம்யூனிகேஷன்ஸ்’ (China Satellite Communications) ஆகியவற்றின் பங்கு மதிப்புகள் அவற்றின் தினசரி உச்ச வரம்பைத் தொட்டன.

சீனாவின் விண்வெளி இலக்கு

சீனா கடந்த பத்து ஆண்டுகளாக மறுபயன்பாட்டு ராக்கெட் தொழில்நுட்பங்களை உருவாக்குவதில் ஈடுபட்டு வருகிறது. இந்த மறுபயன்பாட்டு ராக்கெட் அமைப்பு, சீனாவின் வேகமாக விரிவடைந்து வரும் வணிக செயற்கைக்கோள் கூட்டமைப்பிற்கான ஏவுதல் செலவுகளைக் கணிசமாகக் குறைக்கும்.

இந்தத் தொழில்நுட்பத்தைப் பெறுவதற்கான உலகளாவிய போட்டிகளுக்கு மத்தியில், சீனாவின் தனியார் நிறுவனங்களும் தங்களின் மறுபயன்பாட்டு ராக்கெட்டுகளைச் சோதிக்கும் முயற்சிகளைத் தீவிரப்படுத்தி வருகின்றன.

2030 ஆம் ஆண்டிற்குள் மனிதர்களை நிலவுக்கு அனுப்பும் சீனாவின் திட்டத்திற்காக உருவாக்கப்பட்டு வரும் ‘லாங் மார்ச் 10’ குடும்பத்தின் ஒரு பகுதியாக இந்த ‘லாங் மார்ச் 10B’ உள்ளது.

எனவே, இந்தச் சோதனை ஒட்டுமொத்த சந்திர திட்டத்திற்கும் தேவையான முக்கியத் தரவுகளை வழங்கும். மேலும், இந்த ஆண்டின் இறுதிக்குள் மற்றொரு ஏவுதலுக்காக இந்த பூஸ்டர் அடுக்கை மீண்டும் பயன்படுத்த சீனா திட்டமிட்டுள்ளதாக சிசி டிவி தெரிவித்துள்ளது.