இலங்கை- 168 சிறுமிகள் துஷ்பிரயோகம், 22 பேர் கர்ப்பம்: வெளியான தகவல்
இந்த ஆண்டு செப்டம்பர் மாதத்தில் 168 சிறுவர் பாலியல் துஷ்பிரயோக வழக்குகள் பதிவாகியுள்ளன, அத்துடன் 16 வயதுக்குட்பட்ட 22 சிறுமிகள் கர்ப்பமடைந்துள்ளனர் என்று நாடாளுமன்றக் குழு தெரிவித்துள்ளது.
2024 ஆம் ஆண்டுக்கான வரவு செலவுத் திட்ட முன்மொழிவுகள் மற்றும் யோசனைகள் மற்றும் ஆலோசனைகளைப் பெறுவதற்காக, ஜனநாயகத்திற்கான வெஸ்ட்மின்ஸ்டர் அறக்கட்டளை (WFD) உள்ளிட்ட சிவில் அமைப்புகளின் பிரதிநிதிகளுடன் அண்மையில் பாராளுமன்றத்தில் நடைபெற்ற பொது நிதி தொடர்பான குழுவின் விசேட கலந்துரையாடலின் போது இது வெளிப்படுத்தப்பட்டது.
சிவில் சமூக அமைப்புகளின் பிரதிநிதிகள் சிறுவர்களுக்கு பாலியல் கல்வியை வழங்குவதற்கான ஒரு முறையான வேலைத்திட்டத்தை உருவாக்குவது மிகவும் அவசரமான தேவை என பாராளுமன்றத்தின் தொடர்பாடல் திணைக்களம் தெரிவித்துள்ளது.
சுகாதார வசதிகள் உள்ளிட்ட ஏனைய வசதிகள் தேவைப்படும் பாடசாலை மாணவிகளின் எண்ணிக்கையைக் கண்டறிந்து அவர்களுக்குத் தேவையான வசதிகளை வழங்குவதற்கான அமைப்பைத் தயாரிப்பது தொடர்பிலும் குழுவின் கவனம் செலுத்தப்பட்டது.
பெண்கள் நலனில் கவனம் செலுத்தாமையால் ஏற்படக்கூடிய பிரச்சினைகள் மற்றும் பாடசாலை மாணவிகள் எதிர்நோக்கும் சிரமங்கள் தொடர்பில் சிவில் அமைப்புக்களின் பிரதிநிதிகள் குழுவிடம் விளக்கமளித்தனர்.
(Visited 2 times, 1 visits today)
