அமெரிக்கா ஈரான் மீது எப்போது, ஏன் பொருளாதாரத் தடைகளை விதித்தது?
ஈரான் மீது அமெரிக்கா நீண்டகாலமாகத் தடைகளை விதித்து வருகிறது. 1979-இல் தொடங்கிய இந்தத் தடைகள் ஈரான்-இஸ்ரேல்-அமெரிக்கப் போரின் காரணமாக இந்த ஆண்டும் தொடர்கிறது.
1979
ஈரானில் இஸ்லாமியப் புரட்சிக்குப் பிறகு, ஈரானிய மாணவர்கள் தெஹ்ரானில் உள்ள அமெரிக்கத் தூதரகத்தைக் கைப்பற்றி, அமெரிக்கத் தூதர்களைப் பணயக்கைதிகளாகப் பிடித்தனர்.
இந்தச் சம்பவத்தைத் தொடர்ந்து, அமெரிக்கா முதன்முறையாக ஈரான் மீது பொருளாதாரத் தடைகளை விதித்தது. ஈரானிய இறக்குமதிகளுக்குத் தடை விதித்ததுடன், சுமார் 12 பில்லியன் டொலர் மதிப்புள்ள ஈரானிய சொத்துக்களையும் முடக்கியது.
1984
அமெரிக்கா ஈரானை பயங்கரவாதத்திற்கு ஆதரவளிக்கும் நாடாக அதிகாரப்பூர்வமாக அறிவித்ததைத் தொடர்ந்து, ஈரான் மீது மேலும் பொருளாதார மற்றும் இராஜதந்திரத் தடைகள் விதிக்கப்பட்டன.
1996
ஈரானின் எண்ணெய் துறையில் முதலீடு செய்யும் வெளிநாட்டு நிறுவனங்களுக்கு எதிராக நடவடிக்கை எடுக்க அனுமதிக்கும் ஒரு சட்டத்தை அமெரிக்க காங்கிரஸ் நிறைவேற்றியது, ஆனால் ஐரோப்பிய நாடுகளின் எதிர்ப்பு காரணமாக அந்தச் சட்டம் பல ஆண்டுகளாக முழுமையாகச் செயல்படுத்தப்படவில்லை.
2006
ஐக்கிய நாடுகள் பாதுகாப்பு சபை, ஈரான் தனது யுரேனியம் செறிவூட்டும் திட்டத்தை நிறுத்தத் தவறியதற்காக முதலில் அதன் மீது தடைகளை விதித்தது. பின்னர், அதன் அணுசக்தி நடவடிக்கைகள் மீது மேலும் கடுமையான தடைகளை விதித்தது.
2010
அமெரிக்கா 1996ம் ஆண்டு சட்டத்தை முழுமையாகச் செயல்படுத்தத் தொடங்கியதுடன், ஈரானின் எரிசக்தித் துறையில் ஈடுபட்டுள்ள வெளிநாட்டு நிறுவனங்கள் மீதான அழுத்தத்தையும் அதிகரித்தது.
2012
அமெரிக்கா ஈரானின் மத்திய வங்கி மீது தடைகளை விதித்தது. இதற்குப் பதிலளிக்கும் விதமாக, ஈரான் ஹோர்முஸ் நீரிணையில் எண்ணெய் கப்பல்களின் நடமாட்டத்தைக் கட்டுப்படுத்தும் நடவடிக்கைகளை எடுத்தது.
அதே நேரத்தில், ஐரோப்பிய ஒன்றியமும் ஈரானிய எண்ணெய் இறக்குமதிக்குத் தடை விதித்தது.
2015
ஈரானுக்கும் உலக வல்லரசுகளுக்கும் இடையே வரலாற்றுச் சிறப்புமிக்க அணுசக்தி ஒப்பந்தம் (JCPOA) எட்டப்பட்டது. இந்த ஒப்பந்தத்தின் கீழ், ஈரான் தனது அணுசக்தித் திட்டத்தின் மீதான சில கட்டுப்பாடுகளை ஏற்றுக்கொண்டது, அதே நேரத்தில் அமெரிக்காவும் ஐரோப்பிய நாடுகளும் பொருளாதாரத் தடைகளை கணிசமாகத் தளர்த்தின.
2018
அமெரிக்க ஜனாதிபதி டொனால்ட் டிரம்ப், JCPOA ஒப்பந்தத்திலிருந்து அமெரிக்கா விலகுவதாக அறிவித்ததோடு, ஈரானின் எண்ணெய், வங்கி மற்றும் நிதித் துறைகள் மீது புதிய மற்றும் கடுமையான தடைகளையும் விதித்தார்.
2025
வெள்ளை மாளிகைக்குத் திரும்பிய பிறகு, ஜனாதிபதி டிரம்ப் ஈரானுக்கு எதிரான தடைகளின் வரம்பை மேலும் விரிவுபடுத்தினார். இந்தப் புதிய தடைகள், ஈரானுடன் வர்த்தகத் தொடர்புகளைக் கொண்டிருந்த வெளிநாட்டு நிறுவனங்களையும் அமைப்புகளையும் குறிவைத்தன.
இதில் சீன சுத்திகரிப்பு நிலையங்கள், கப்பல் நிறுவனங்கள் மற்றும் ஈரானிய எண்ணெயை வாங்கிய பிற சர்வதேச நிறுவனங்களும் அடங்கும்.
இந்த ஆண்டு ஈரான் மற்றும் அமெரிக்கா இடையே மீண்டும் தொடங்கிய பேச்சுவார்த்தைகளைத் தொடர்ந்து, ஈரானிய எண்ணெயின் உற்பத்தி, ஏற்றுமதி மற்றும் விற்பனைக்கு அமெரிக்கா 60 நாள் வரையறுக்கப்பட்ட விலக்களித்துள்ளது.
இது இரு நாடுகளுக்கும் இடையிலான பதட்டங்களைக் குறைப்பதற்கும், ஒரு சாத்தியமான உடன்பாட்டை எட்டுவதற்கும் குறிப்பிடத்தக்க நடவடிக்கையாகப் பாராட்டப்படுகிறது.
