இலங்கை : கல்ஓயா ஆற்றின் கரை உடைந்து விழும் அபாயம் : நூற்றுக்கும் மேற்பட்ட மக்கள் வெளியேற்றம்!

கல் ஓயா ஆற்றின் கரை உடைந்து விழும் அபாயம் உள்ளது. இதன்காரணமாக அப்பகுதியில் உள்ள 40 குடும்பங்களை வெளியேற்ற நடவடிக்கை எடுக்கப்பட்டுள்ளதாக அறிவிக்கப்பட்டுள்ளது.

அம்பாறை, சேனநாயக்கபுர மற்றும் சமபுர பகுதிகளில் உள்ள 40 குடும்பங்களைச் சேர்ந்த 100க்கும் மேற்பட்ட மக்களை பாதுகாப்பான இடங்களுக்கு வெளியேற்ற நடவடிக்கை எடுக்கப்பட்டுள்ளதாக அம்பாறை மாவட்ட செயலாளர் தெரிவித்தார்.

இது குறித்து கருத்து தெரிவித்த அம்பாறை மாவட்ட செயலாளர் சிந்தக அபேவிக்ரம, “சேனநாயக்கபுர பகுதியில் உள்ள கல்லோயா ஆற்றின் கரைகள் அரிக்கப்பட்டுள்ளன. மணல் மூட்டைகளை வைத்து தற்காலிகமாக சரிசெய்ய வாய்ப்பில்லை.

தற்போது, ​​அது உடையும் அபாயம் மட்டுமே உள்ளது. அது உடைக்கப்படவில்லை. ஆனால் அது உடைந்தால் அம்பாறை பிரதேச செயலகப் பிரிவின் சேனநாயக்கபுர மற்றும் சமபுர கிராம அலுவலர் பிரிவுகளின் சுதுவெல்ல பகுதி வெள்ள சூழ்நிலையால் பாதிக்கப்படலாம்” எனத் தெரிவித்துள்ளார்.