வீழ்ந்தாலும் வீரர்களைக் கொண்டாடிய நோர்வே

FIFA உலகக் கோப்பை கால்பந்து தொடரில் காலிறுதிவரை முன்னேறி தாயகம் திரும்பிய நோர்வே அணிக்கு ஒஸ்லோவின் தெருக்களில் 1,00,000-க்கும் அதிகமான ரசிகர்கள் திரண்டு வந்து வரவேற்பளித்தனர்.

கடந்த சனிக்கிழமை நடைபெற்ற காலிறுதிப் போட்டியில் இங்கிலாந்திடம் 2-1 என்ற கோல் கணக்கில் கூடுதல் நேரத்தில் (extra-time) தோல்வியடைந்ததைத் தொடர்ந்து, நோர்வே அணியின் வரலாற்றுச் சிறப்புமிக்க உலகக் கோப்பை பயணம் முடிவுக்கு வந்தது.

இது அரையிறுதிக்கு முன்னேற வேண்டும் என்ற நோர்வேயின் கனவைச் சிதைத்த போதிலும்,
இத்தொடரில் தமது நாட்டு வீரர்கள் வெளிப்படுத்திய திறமைக்கு மக்கள் அங்கீகாரமளிக்கும் வகையில் அணிதிரண்டு வரவேற்பளித்தனர்.

நோர்வேயின் கோடைகால வெயிலுக்கு மத்தியில், திங்கள்கிழமை மதிய வேளையில் ராயல் அரண்மனை (Royal Palace) மைதானத்தில் பெருந்திரளான மக்கள் திரண்டனர். அதிகாரப்பூர்வமற்ற மதிப்பீடுகளின்படி, அங்கு 1,00,000-க்கும் அதிகமான மக்கள் கூடியிருந்ததாகத் தெரிகிறது.

தலைநகரில் தங்களது தாயகம் திரும்பும் ஊர்வலத்தைத் தொடங்குவதற்கு முன்னதாக, நோர்வே அணிக்கு பாரம்பரிய முறைப்படி நீர் பீரங்கி மூலம் (water cannon salute) வான்வழி மரியாதை செலுத்தி வரவேற்பு அளிக்கப்பட்டது.

நோர்வே நாட்டு அரசர் ஹரால்டை (King Harald) சந்திப்பதற்காக வீரர்கள் முதலில் அரண்மனைக்குச் சென்றபோது, அவர்களை வரவேற்கக் கூடியிருந்த ஆதரவாளர்களின் கூட்டம் அரண்மனை சதுக்கத்தை நிறைத்து, அங்கிருந்து பிரதான வீதியான ‘கார்ல் ஜோஹான்ஸ் கேட்’ (Karl Johans gate) வரை நீண்ட தூரத்திற்குப் பரவி நின்றது.

அரண்மனைச் சந்திப்பு முடிந்த பின்னர், வீரர்கள் ரசிகர்களை நோக்கி வந்து தங்களது வாழ்த்துகளைப் பகிர்ந்துகொண்டனர். அப்போது அவர்களுக்குப் பின்னால் அரசக் காவலர்கள் (Royal Guard) அணிவகுத்து நின்றனர்.

நோர்வே அணியின் நட்சத்திர முன்கள வீரரான எர்லிங் ஹாலாண்ட் (Erling Haaland), தனிப்பட்ட காரணங்களால் முன்னதாகவே கிளம்பிவிட்டதால், கொண்டாட்டத்தின் இறுதிக்கட்டத்தில் அவர் கலந்துகொள்ளவில்லை.