இஸ்ரேல் – காசா போர் நிறுத்த ஒப்பந்தம் அறிவிக்கப்பட்டதை தொடர்ந்தும் தாக்குதல் : 86 பாலஸ்தீனியர்கள் பலி!

இஸ்ரேலுக்கும் ஹமாஸுக்கும் இடையில் போர் நிறுத்த ஒப்பந்தம் அறிவிக்கப்பட்டதிலிருந்து காசா பகுதி முழுவதும் இஸ்ரேலிய தாக்குதல்களில் குறைந்தது 86 பாலஸ்தீனியர்கள் கொல்லப்பட்டதாக காசாவின் சிவில் பாதுகாப்பு அமைப்பு தெரிவித்துள்ளது.

இஸ்ரேலிய தாக்குதல்களில் 250 க்கும் மேற்பட்டோர் காயமடைந்ததாக அவர்கள் மேலும் தெரிவித்தனர்.

கத்தாரின் தோஹாவில் பல வாரங்களாக நடந்த தீவிர பேச்சுவார்த்தைகளுக்குப் பிறகு கடந்த புதன்கிழமை போர் நிறுத்த ஒப்பந்தம் அறிவிக்கப்பட்டது.

ஒரு வருடத்திற்கும் மேலாக தோல்வியடைந்த முயற்சிகளைத் தொடர்ந்து இறுதி சுற்று பேச்சுவார்த்தைகள் நடந்தன.

மூன்று போர் நிறுத்த கட்டங்களில் முதலாவது கட்டம் ஞாயிற்றுக்கிழமை அமலுக்கு வர உள்ளது, இருப்பினும் இஸ்ரேலிய பிரதமர் பெஞ்சமின் நெதன்யாகுவின் அமைச்சரவையின் ஒப்புதலுக்காக இன்னும் காத்திருக்கிறது.

முதல் கட்டம் வெற்றியடைந்தால், இரண்டாவது கட்டம் 42 நாட்களுக்குப் பிறகு தொடங்கும் என்று தோஹாவில் ஒப்பந்தத்தை அறிவித்த கத்தார் பிரதமர் ஷேக் முகமது பின் அப்துல்ரஹ்மான் அல் தானி தெரிவித்தார்.