அமெரிக்காவிற்கு கார்களை அனுப்புவதை நிறுத்திய ஜாகுவார் மற்றும் லேண்ட் ரோவர் நிறுவனம்

பிரித்தானியாவை தளமாகக் கொண்ட சொகுசு கார் உற்பத்தியாளரான ஜாகுவார் லேண்ட் ரோவர், அதன் வாகனங்களை அமெரிக்காவிற்கு அனுப்புவதை நிறுத்தியுள்ளது.

அமெரிக்க ஜனாதிபதி டொனால்ட் டிரம்ப் வெளிநாட்டுத் தயாரிப்பு கார்களுக்கு அதிக வரிகளை விதித்ததைத் தொடர்ந்து, அமெரிக்காவிற்கான தனது கார்களின் ஏற்றுமதியை நிறுத்தியதாக நிறுவனம் தெரிவித்துள்ளது.

ஜாகுவார் லேண்ட் ரோவரின் ஆண்டு உற்பத்தியில் கால் பகுதி அமெரிக்காவிற்கு ஏற்றுமதி செய்யப்படுகிறது.

கடுமையான வரிகளுக்கு நீண்டகால தீர்வுகள் உருவாக்கப்படும் வரை, குறுகிய கால நடவடிக்கையாக ஏற்றுமதியை நிறுத்தி வைப்பதாக நிறுவனம் தெரிவித்துள்ளது.

ஒட்டுமொத்தமாக, பிரித்தானியாவில் உற்பத்தி செய்யப்படும் 8 கார்களில் ஒன்று அமெரிக்காவிற்கு ஏற்றுமதி செய்யப்படுகிறது.

டிரம்ப் விதித்த புதிய வர்த்தக விதிகள் காரணமாக வாகன உற்பத்தித் துறையில் 25,000க்கும் மேற்பட்ட நேரடி வேலைகள் ஆபத்தில் இருப்பதாகத் தெரிவிக்கப்படுகிறது.