பாரியளவில் வெளிநாட்டு வேலைவாய்ப்பு மோசடி -போலி முகமைகள் முற்றுகை

நாடு முழுவதும் அதிகரித்து வரும் நிதி மோசடி முறைப்பாடுகளைத் தொடர்ந்து, “விசா ஆலோசனை சேவைகள்” என்ற பெயரில் இயங்கும் போலி வெளிநாட்டு வேலைவாய்ப்பு நிலையங்கள் மீது அதிகாரிகள் தீவிர நடவடிக்கை மேற்கொண்டுள்ளனர்.

இலங்கை வெளிநாட்டு வேலைவாய்ப்பு பணியகத்தின் (SLBFE) விசேட புலனாய்வுப் பிரிவு, வெளிநாட்டு வேலைவாய்ப்புகளை போலியாக வழங்கி பணம் வசூலித்ததாகக் குற்றம் சுமத்தப்பட்ட நிறுவனங்களை இலக்குவைத்து சோதனைகளை விரிவுபடுத்தியுள்ளது.

ஜா-எல மற்றும் கடான பகுதிகளில் மேற்கொள்ளப்பட்ட சோதனையில், ருமேனியாவில் லொறி ஓட்டுநர் வேலைவாய்ப்பு வழங்குவதாக கூறி இருவரிடமிருந்து  3.6 மில்லியன் ரூபா வசூலித்ததாகக் குற்றம் சாட்டப்பட்ட நிறுவனம் ஒன்று சோதனை செய்யப்பட்டது.

முறைப்பாட்டின் அடிப்படையில் நிறுவன உரிமையாளர் கைது செய்யப்பட்டு, வேலை ஒப்பந்தங்கள் தயாரிக்கப் பயன்படுத்தியதாகக் கூறப்படும் ஆவணங்கள் மற்றும் மடிக்கணினி பறிமுதல் செய்யப்பட்டன.

சந்தேக நபர் வெலிசறை நீதவான் நீதிமன்றத்தில் ஆஜர்படுத்தப்பட்டதைத் தொடர்ந்து விளக்கமறியல் வைக்கப்பட்டுள்ளார்.

மோசடிக்கு உதவியதாகக் கூறப்படும் பெண் ஒருவர் பின்னர் வாக்குமூலம் அளிக்க அழைக்கப்பட்டு, புகார்தாரர்களின் கடவுச்சீட்டுகள்  பறிமுதல் செய்யப்பட்டன.
அவர் பின்னர் கைது செய்யப்பட்டு பெப்ரவரி 25 ஆம் திகதி வரை  விளக்கமறியல் வைக்கப்பட்டுள்ளார்.

இதனிடையே, பெப்ரவரி 17ஆம் திகதி நீர்கொழும்பில் நடத்தப்பட்ட  சோதனையில், சமூக ஊடகங்கள் மூலம் ஐரோப்பா மற்றும் கனடாவில் வேலைவாய்ப்பு வழங்குவதாக போலியாக விளம்பரப்படுத்தி பணம் வசூலித்ததாகக் குற்றம் சாட்டப்பட்ட மற்றொரு நிறுவனம் இலக்கு வைக்கப்பட்டது.

கனடாவில் பராமரிப்பு வேலை பெற்றுத் தருவதாக கூறி 5.5 மில்லியன் ரூபா வசூலித்ததாக விசாரணையில் தெரியவந்துள்ளது.

சோதனையின் போது வேலைவாய்ப்பு தொடர்பான ஆவணங்கள் மற்றும் கடவுச்சீட்டொன்றும்  பறிமுதல் செய்யப்பட்டன. குறித்த நிறுவன உரிமையாளர்  நீதிமன்றத்தில் ஆஜர்படுத்தப்பட்டு, 250,000 ரூபா செலுத்த ஒப்புக்கொண்டதைத் தொடர்ந்து பிணையில் விடுவிக்கப்பட்டார்.

எந்தவொரு பணப்பரிவர்த்தனைகளையும் மேற்கொள்ளும் முன், நிறுவனங்கள் முறையாக பதிவு செய்யப்பட்டுள்ளதா என்பதை பொதுமக்கள் சரிபார்க்க வேண்டும் என அதிகாரிகள் வலியுறுத்தியுள்ளனர்.