இலங்கைப் பெருங்கடலை மாசுப்படுத்திய 26 கப்பல்கள் – செயற்கைக்கோள் தொழில்நுட்பம் மூலம் கசிந்த தகவல்கள்!!

கடந்த ஒரு வருடத்தில் 26 கப்பல்கள் இலங்கைப் பெருங்கடலை மாசுபடுத்தியுள்ளதாக கடல்சார் சுற்றாடல் பாதுகாப்பு அதிகாரசபை தெரிவித்துள்ளது.

பிரான்ஸ் அரசுடன் இணைந்து செயற்கைக்கோள் தொழில்நுட்பம் மூலம் தொடங்கப்பட்ட கண்காணிப்பு திட்டத்தின் தரவுகளின் அடிப்படையில் இந்த உண்மைகளை ஆணையம் வெளிப்படுத்தியுள்ளது.

அண்மைக்கால வரலாற்றில், இலங்கைப் பெருங்கடலுக்கு கடுமையான சேதத்தை ஏற்படுத்திய இரண்டு கப்பல் விபத்துக்கள் எக்ஸ்பிரஸ் பேர்ல் மற்றும் நியூ டயமண்ட் கப்பல் விபத்துக்கள் ஆகும்.

செப்டம்பர் 2020 இல், நியூ டயமண்ட் கப்பல் இலங்கையின் கிழக்கு கடற்கரையிலிருந்து 38 கடல் மைல் தொலைவில் கரை ஒதுங்கியது.

மேலும், 2021 ஆம் ஆண்டு மே மாதம் சிங்கப்பூரில் பதிவு செய்யப்பட்ட எக்ஸ்பிரஸ் பேர்ல் என்ற கப்பல் கொழும்பு துறைமுகத்திற்கு அருகில் உள்ள கடலில் தீப்பிடித்து மூழ்கியது.

இந்த கப்பல் விபத்துக்கள் காரணமாக இலங்கையின் கடல் சுற்றுச்சூழலுக்கு கடுமையான மற்றும் நீண்டகால சேதம் ஏற்பட்டுள்ளதாக விசாரணைகளில் தெரியவந்துள்ளது.

இவ்வாறான கடல் சூழல் மாசுபாடு விபத்துக்கள் இடம்பெற்ற சூழலில் பிரான்ஸ் அரசாங்கத்தின் உதவியுடன் இலங்கை கடற்பரப்பில் செயற்கைக்கோள் தொழில்நுட்பத்தின் அடிப்படையில் எரிபொருள் கசிவுகளை ஆராய கடல்சார் சுற்றாடல் பாதுகாப்பு அதிகாரசபை மற்றும் பிரான்ஸ் நிறுவனத்தினால் முன்னோடித் திட்டம் ஒன்று நடத்தப்பட்டது.

அங்கு பெறப்பட்ட தரவுகளில் இருந்து கடந்த ஓராண்டில் இலங்கைப் பெருங்கடலுக்குள் நுழைந்த 26 கப்பல்கள் இலங்கைப் பெருங்கடலை மாசுபடுத்தியுள்ளதாக தெரியவந்துள்ளது.