ஜி20 மாநாட்டில் பங்கேற்க புடின் இந்தியா வருவாரா? ரஷ்ய அதிபர் மாளிகை வெளியிட்ட தகவல்

ஜி20 உச்சிமாநாட்டில் பங்கேற்க ரஷ்ய அதிபர் புடின் இந்தியா வரமாட்டார் என ரஷ்ய அதிபர் மாளிகை கிரிம்ளின் தெரிவித்துள்ளது.

அத்துடன் உச்சிமாநாட்டில் புடின் காணொலி வாயிலாக அல்லது பிற வழிகளில் பங்கேற்பது குறித்த முடிவு பின்னர் அறிவிக்கப்படும் என ரஷ்ய அதிபர் மாளிகை தெரிவித்துள்ளது.

முன்னதாக, தென் ஆப்பிரிக்காவில் நடைபெற்ற பிரிக்ஸ் மாநாட்டிலும் புடின் நேரடியாக பங்கேற்கவில்லை. மாறாக மாநாட்டில் புடின் காணொலி மூலம் பங்கேற்று உரையாற்றினார் என்பது குறிப்பிடத்தக்கது.

பிரிக்ஸ் மாநாட்டை போன்றே ஜி20 மாநாட்டிலும் புடின் காணொலி வாயிலாக பங்கேற்க அதிக வாய்ப்பு உள்ளதாக தகவல் வெளியாகியுள்ளது.

ஜி20 நாடுகளின் பல்வேறு துறை சார்ந்த மந்திரிகள் கூட்டம் இந்தியாவின் பல்வேறு நகரங்களில் கடந்த சில மாதங்களாக நடைபெற்று வருகிறது. காஷ்மீர், சென்னை என பல்வேறு நகரங்களில் ஜி20 நாடுகளின் மந்திரிகள் மட்டத்திலான கூட்டம் நடைபெற்றது.

இந்நிலையில், ஜி20 நாடுகளின் தலைவர்கள் மட்டத்திலான உச்சிமாநாடு வரும் 8ம் திகதி முதல் 10ம் திகதி வரை டெல்லியில் நடைபெற உள்ளது. இந்த மாநாட்டில் ஜி20 நாடுகளின் தலைவர்கள் பங்கேற்க உள்ளனர் என்பதும் குறிப்பிடத்தக்கது.