ChatGPT ஆல் அமெரிக்க சட்டத்தரணிக்கு ஏற்பட்ட சோதனை

நியூயார்க் வழக்கறிஞர் ஒருவர் தனது சட்ட ஆராய்ச்சிற்கு AI கருவியான ChatGPT ஐப்  பயன்படுத்தியமையால், நீதிமன்ற விசாரணையை எதிர்கொண்டுள்ளார்.

நபர் ஒருவர் விமானம் நிறுவனம் மீது வழக்கு தொடர்ந்துள்ள நிலையில், அந்த வழக்கை முன்கொண்டு நடத்துவதற்காக சில முன்னோடி வழக்குகளை உதாரணமாக முன்வைப்பதற்கு வழக்கறிஞர் ChatGPT ஐப் பயன்படுத்தியுள்ளார்.

இந்நிலையில், இவ்வாறாக குறிப்பிடப்பட்ட முன்னோடி வழக்குகளை  தங்களால் கண்டுப்பிடிக்க முடியவில்லை என விமான நிறுவனம் சார்பில் முன்னிலையான வழக்கறிஞர் குறிப்பிட்டார். இதனையடுத்து முன்னோடி வழக்குகள் குறித்து விவரிக்க வேண்டும் என நீதிபதி உத்தரவு பிறப்பித்தார்.

இந்த சூழலில் 30 ஆண்டுகளுக்கும் மேல் வழக்கறிஞராக பணியாற்றிவரும், ஸ்டீவன் ஏ ஸ்வார்ட்ஸ் முந்தைய வழக்குகளைத் தேடுவதற்கு ChatGPT ஐப் பயன்படுத்தியதை ஒப்புக்கொண்டுள்ளார்.

அதேநேரம் ChatGPT  ஐ நம்பியமைக்கு மிகவும் வருந்துகிறேன் என்றும் தெரிவித்தார். இதற்கு முன்பு பயன்படுத்தியதில்லை, அதன் உள்ளடக்கம் பொய்யாக இருக்கலாம் எனவும் அவர் கூறினார்.

எதிர்காலத்தில் “அதன் நம்பகத்தன்மையின் முழுமையான சரிபார்ப்பு இல்லாமல்” தனது சட்ட ஆராய்ச்சிக்கு “துணையாக” AI ஐ பயன்படுத்த மாட்டேன் என்றும்  அவர் சபதம் செய்துள்ளார்.