இலங்கையில் அதிகரிக்கும் வெப்பநிலை : கல்வி அமைச்சு வெளியிட்டுள்ள விசேட அறிவிப்பு!

இலங்கையில் இன்று (28.02) நாளை (29.02) மற்றும் நாளை மறுதினம் (01.03) அதிக வெப்பமான காலநிலை மேலும் அதிகரிக்கக்கூடும் என்பதால் பாடசாலை மாணவர்கள் வெளியில் தங்குவதை தவிர்க்குமாறு கல்வி அமைச்சு அறிவித்துள்ளது.

இதன்படி, எந்தவொரு பாடசாலையிலும் பயிலும் மாணவர்கள் அதிக வெப்பநிலையின் போது வெளிப்புற விளையாட்டு பயிற்சி நடவடிக்கைகள் அல்லது விளையாட்டு நிகழ்வுகள் அல்லது வேறு எந்த வெளி நடவடிக்கைகளிலும் ஈடுபட வேண்டாம் என அறிவிக்கப்பட்டுள்ளது.

இது தொடர்பில் அனைத்து பாடசாலை அதிபர்களுக்கும் அறிவிக்குமாறு மாகாண மற்றும் பிராந்திய கல்வி அதிகாரிகளுக்கு ஏற்கனவே பணிப்புரை விடுக்கப்பட்டுள்ளதாகவும், எதிர்காலத்தில் பாடசாலைகளுக்கு வழங்கப்படும் அறிவுறுத்தல்களுக்கு அமைய சுகாதார அமைச்சும் கல்வி அமைச்சும் செயற்பட வேண்டும் எனவும் அந்த அறிவிப்பில் மேலும் தெரிவிக்கப்பட்டுள்ளது.