அரசு வைத்தியசாலைகளில் சிகிச்சை பெற வருபவர்களின் எண்ணிக்கை வேகமாக அதிகரிப்பு

அரச வைத்தியசாலைகளில் சிகிச்சை பெற வரும் மக்களின் எண்ணிக்கை வேகமாக அதிகரித்து வருவதாக சுகாதார அமைச்சர் கெஹலிய ரம்புக்வெல்ல தெரிவித்துள்ளார்.

இன்று காலை பாராளுமன்றத்தில் உரையாற்றிய சுகாதார அமைச்சர் ரம்புக்வெல்ல, கடந்த 9 மாதங்களில் கொழும்பு தேசிய வைத்தியசாலையின் வெளிநோயாளர் பிரிவில் சிகிச்சை பெறுவோர் எண்ணிக்கை 49.1 வீதத்தால் அதிகரித்துள்ளதாக தெரிவித்தார்.

கண்டி தேசிய வைத்தியசாலையின் வெளிநோயாளர் பிரிவில் சிகிச்சை பெற வரும் நோயாளர்களின் எண்ணிக்கையும் 6.6 வீதத்தால் அதிகரித்துள்ளது.

அதன்படி, இவ்வருடம் அரச வைத்தியசாலைகளின் வெளிநோயாளர் பிரிவில் சிகிச்சை பெற வந்தவர்களின் ஒட்டுமொத்த வளர்ச்சி 40 வீதத்தால் அதிகரித்துள்ளதாக அவர் குறிப்பிட்டுள்ளார்.

அரசாங்க வைத்தியசாலைகளில் உள்நோயாளிகளாக சிகிச்சை பெறுபவர்களின் எண்ணிக்கையும் 27 வீதத்தால் அதிகரித்துள்ளதாக சுகாதார அமைச்சர் தெரிவித்துள்ளார்.

தனியார் வைத்தியசாலைகளின் செலவுகளை பெரும்பாலான மக்கள் ஏற்றுக்கொள்ள முடியாத நிலையில் தற்போது பலர் அரச வைத்தியசாலைகளில் சிகிச்சை பெற்று வருவதாக தாம் கருதுவதாக அமைச்சர் கெஹலிய ரம்புக்வெல்ல தெரிவித்துள்ளார்.