பெருவில் போட்டியின் போது மின்னல் தாக்கி கால்பந்து வீரர் உயிரிழப்பு!

பெரு நாட்டில் நடந்த போட்டியின்போது மின்னல் தாக்கி 39 வயதான கால்பந்து வீரர் உயிரிழந்தார். மேலும் 5 வீரர்கள் காயமடைந்தனர்.

பெரு நாட்டின் ஹுயாகயா மாகாணத்தில் உள்ள சில்கா மாவட்டத்தில் நேற்று முன்தினம் உள்ளூர் கால்பந்துப் போட்டி நடைபெற்றது. இதில் உள்ளூர் அணிகளான ஜுவன்டெட் பெல்லாவிஸ்டா, ஃபேமிலியா சோக்கா ஆகிய அணிகள் மோதின.

போட்டி நடந்து கொண்டிருந்தபோது கருமேகங்கள் சூழ்ந்து மின்னல் வெட்டியது. அப்போது மைதானத்தில் விளையாடிக் கொண்டிருந்த வீரர் ஜோஸ் ஹுகோ டி லா குரூஸ் மெஸா என்ற வீரர் மீது மின்னல் தாக்கியது. அவர் அந்த இடத்திலேயே சுருண்டு விழுந்து இறந்தார். மின்னல் தாக்கியதால் மேலும் 5 வீரர்கள் காயமடைந்தனர்.

மின்னல் பாய்ந்ததும் கால்பந்து போட்டியாளர்கள் போட்டியை நிறுத்திவிட்டு காயமடைந்த வீரர்களை நோக்கி ஓடினர். அப்போது ஜோஸ் ஹுகோ டி லா அதே இடத்திலேயே உடனடியாக இறந்தது தெரியவந்தது. காயமடைந்த மற்ற 5 வீரர்கள் அருகிலுள்ள மருத்துவமனையில் சேர்க்கப் பட்டனர்.

காயமடைந்தவர்களில் கோல்கீப்பர் ஜுவான் சோக்கா (40), கிறிஸ்டியன் சீசசர் பிடுய் காஹுவானா உள்ளிட்டோரும் அடங்குவர். மின்னல் தாக்கியதில் இவர்கள் உடல் முழுவதும் காயங்கள் ஏற்பட்டுள்ளன. மின்னல் பாய்ந்ததால் போட்டி நிறுத்தப்பட்டு ஜுவான்டெட் பெல்லாவிஸ்டா அணி 2-0 என்ற கோல் கணக்கில் வெற்றி பெற்றதாக அறிவிக்கப்பட்டது. மொத்தம் 22 நிமிடங்கள் மட்டுமே இந்த போட்டி நடைபெற்றது. இந்த சம்பவத்தால் போட்டியில் கலந்துகொண்ட வீரர்களும், போட்டியைப் பார்க்க வந்த ரசிகர்களும் அதிர்ச்சியில் உறைந்தனர்.

போட்டி நடந்த மைதானமானது கடல் மட்டத்திலிருந்து 10,659 அடி உயரத்தில் அமைந்துள்ளது. மழைக்காலத்தின்போது இங்கு அடிக்கடி மின்னல் தாக்கும் சம்பவங்கள் நடைபெறும் என்பது குறிப்பிடத்தக்கது. மைதானத்தில் கால்பந்துப்போட்டி நடந்து கொண்டிருக்கும்போது மின்னல் தாக்கியதை மைதானத்தில் இருந்த சில ரசிகர்கள் வீடியோவாக எடுத்துள்ளனர். அந்த வீடியோவில் மைதானத்தில் தீப்பிழம்பு ஏற்படுவது போல மின்னல் தாக்குகிறது. மின்னல் தாக்கிய அதே விநாடியில் கால்பந்து வீரர் கீழே சுருண்டு விழுவதும் வீடியோவில் பதிவாகியுள்ளது. மேலும் மைதானத்தில் அவருடன் விளையாடிய வீரர்கள் 5 பேரும் மின்னல் தாக்கி காயமடைந்து விழுவதும் அந்த வீடியோவில் பதிவாகியுள்ளது.

தொடர்புடைய செய்திகள்:

70,000 அரசு ஊழியர்களை பணிநீக்கம் செய்ய திட்டமிட்டுள்ள அர்ஜென்டினா ஜனாதிபதி பிரேசிலில் ஹோட்டலில் ஏற்பட்ட தீ விபத்தில் 10 பேர் பலி பிரேசிலை உலுக்கிய கடும் மழை – வெள்ளத்தில் சிக்கி 90 பேர் பலி பிரேசிலில் 62 பேரை ஏற்றிச் சென்ற விமானம் விபத்து ட்ரம்பின் பங்குகள் சரிவு : கமலா ஹாரிஸ் பக்கம் சாயும் முதலீட்டாளர்கள்! 1.3 டன் சுறா துடுப்புகளை பறிமுதல் செய்த பெருவியன் பொலிஸார்