40 கிலோ கொக்கைன் கடத்தல்: ஆஸ்திரேலியாவில் சந்தேகத்திற்கிடமான லாரி எரிப்பு!

ஆஸ்திரேலியா, வடக்கு குயின்ஸ்லாந்தின் ஒதுக்குப்புறமான படகுத் துறைமுகத்திற்கு அருகே சுமார் 6 மில்லியன் டாலர் மதிப்புடையதாக மதிப்பிடப்பட்ட கொக்கைன் போதைப்பொருள் பொதிகள் கண்டெடுக்கப்பட்டுள்ளன.

Mackay வடக்கே 100 கிலோமீட்டர் தொலைவில் உள்ள Midge Point , Jimmys Rock படகுத் துறைமுகத்தில் சனிக்கிழமை காலை 8 மணியளவில் 40 கிலோகிராம் எடையுள்ளகொக்கைன் கண்டெடுக்கப்பட்டதாகத் தெரிவிக்கப்பட்டுள்ளது.

இந்தப் போதைப்பொருள் பொதிகள் வெளிநாட்டிலிருந்து வந்திருக்கலாம் எனப் பொலிஸார் கருதுகின்றனர்.

முன்னதாக, அங்கு லாரி ஒன்று தீப்பற்றி எரிவதாகத் தகவல் கிடைத்து வந்த கிராமப்புற தீயணைப்பு வீரர்கள், பின்புறம் கிரேன் (crane) பொருத்தப்பட்ட ஒரு பிளாட்-பெட் (flat-bed) லாரி கொழுந்துவிட்டு எரிவதைக் கண்டனர். காலை 8.30 மணியளவில் தீ முழுமையாக அணைக்கப்பட்டது.

மண் சாலை வழியாக மட்டுமே செல்லக்கூடிய அந்த ஒதுக்குப்புறமான படகுத் துறைமுகத்தில், எரியும் லாரியின் அருகே சந்தேகத்திற்கிடமான பொதிகள் கண்டெடுக்கப்பட்டதை அடுத்து காவல்துறைக்குத் தகவல் தெரிவிக்கப்பட்டது.

“காவல்துறையினர் அப்பகுதியில் நிலப்பரப்பிலும், அருகிலுள்ள நீர்நிலைகளிலும் தீவிரமான ரோந்துப் பணிகளை மேற்கொண்டனர்,” என்று அந்த அறிக்கையில் கூறப்பட்டுள்ளது.

“பொதுமக்கள் இது போன்ற மேலும் ஏதேனும் பொதிகளைக் கண்டால், அவற்றைத் தொடாமல் உடனடியாகக் காவல்துறைக்குத் தொடர்பு கொள்ளுமாறு கேட்டுக்கொள்ளப்படுகிறார்கள்.”

சனிக்கிழமை நள்ளிரவு 12 மணி முதல் 12.15 மணி வரை அந்த படகுத் துறைமுகத்திற்கு அருகே இருந்தவர்கள், இது குறித்த ஏதேனும் தகவல்களையோ, சிசிடிவி (CCTV) அல்லது டேஷ்கேம் (dashcam) காட்சிகளையோ வைத்திருந்தால், உடனடியாக முன்வந்து தகவல் அளிக்குமாறு காவல்துறை கேட்டுக்கொண்டுள்ளது.