ஆஸ்திரேலிய பிரதமருக்கு ‘அரசியல் தலையிடி’ – தேசிய பாதுகாப்பு ஆலோசகர் இராஜினாமா!

தேசிய பாதுகாப்பு விவகாரம் தொடர்பில் ஆஸ்திரேலிய பிரதமர் Anthony Albanese கடும் விமர்சனங்களுக்கு உள்ளாகியுள்ள நிலையில், அவரது தேசிய பாதுகாப்பு ஆலோசகர் Philippa Brant பதவி விலகியுள்ளார்.

இவ்வாரம் அவர் உத்தியோகப்பூர்வமாக பதவி விலகிச்செல்வார் என ஆஸ்திரேலிய ஊடகங்கள் செய்தி வெளியிட்டுள்ளன.

பிரதமரின் வெளிவிவகாரம் தொடர்பான ஆலோசகர் சில மாதங்களுக்கு முன்னர் பதவி விலகி இருந்த நிலையிலேயே தற்போது தேசிய பாதுகாப்பு ஆலோசகரும் விடைபெறுகின்றார்.

கடந்த டிசம்பர் 14 ஆம் திகதி ஆஸ்திரேலியா, சிட்னி போண்டி கடற்கரையில் யூத சமூகத்தை இலக்கு வைத்து பயங்கரவாதத் தாக்குதல் நடத்தப்பட்டது.

இதில் 15 பேர் பலியாகினர். ஆஸ்திரேலியாவில் நடந்த மிகக் கொடூரமான பயங்கரவாதத் தாக்குதலாக இது கருதப்படுகின்றது. இதனையடுத்து பிரதமரின் அரசியல் தலைமைத்துவம் தொடர்பில் கடும் விமர்சனங்கள் எழுந்தன.

இவ்வாறானதொரு பின்புலத்திலேயே பிரதமரின் தேசிய பாதுகாப்பு ஆலோசகரின் Philippa Brant பதவி துறப்பு அறிவிப்பு வெளியாகியுள்ளது.

எனினும், பயங்கரவாதத் தாக்குதலுக்கும், பதவி விலகலுக்கும் தொடர்பில்லை என லேபர் கட்சி முக்கியஸ்தர் ஒருவர் தெரிவித்துள்ளார்.