கனடா தனது இராணுவ பங்களிப்பை அதிகரிக்க வேண்டும் – பென்டகன் அதிகாரி வலியுறுத்து!

வட அமெரிக்க விண்வெளி பாதுகாப்பு கட்டளைக்குள் (NORAD) நேட்டோ மற்றும் அமெரிக்காவுடன் இணைந்து செயல்பட கனடா தனது இராணுவ பங்களிப்பை அதிகரிக்க வேண்டும் என்று பென்டகனின் மூத்த அதிகாரி ஒருவர் வலியுறுத்தியுள்ளார்.

புகழ்பெற்ற இராணுவ வரலாறு இருந்தபோதிலும், பனிப்போருக்குப் பிறகு கனடாவின் ஆயுதப்படைகள் குறைந்துவிட்டதாக கொள்கைக்கான பாதுகாப்பு துணைச் செயலாளர் எல்பிரிட்ஜ் கோல்பி (Elbridge Colby) சுட்டிக்காட்டியுள்ளார்.

NORAD இன் கீழ் உள்நாட்டுப் பாதுகாப்பு மற்றும் சாத்தியமான கோல்டன் டோம் ஏவுகணை பாதுகாப்புத் திட்டம் குறித்து அமெரிக்க பாதுகாப்புத்துறை கனடாவுடன் தொடர்ந்து பேச்சுவார்த்தை நடத்தி வருகின்ற நிலையில் அவர் இந்த கருத்தை முன்வைத்துள்ளார்.

ட்ரம்பின்  கட்டண அச்சுறுத்தல்கள் மற்றும் கருத்துகள் காரணமாக இரு நாடுகளுக்கும் இடையிலான உறவு சமீபத்தில் பதட்டமாக உள்ளது.

இதற்கிடையில் முன்னர் அமெரிக்காவிடம் இருந்து கொள்வனவு செய்யவுள்ளதாக அறிவிக்கப்பட்டிருந்த F-35 போர் விமானங்களை குறைப்பதற்கும் கனடா தீர்மானித்துள்ளதாக கூறப்படுகிறது. இது இருநாட்டு உறவுகளையும் மேலும் மோசமான நிலைக்கு தள்ளியுள்ளமை குறிப்பிடத்தக்கது.