எரிபொருள் தட்டுப்பாடு : வரிசையில் நிற்கும் மக்கள் – CPC எச்சரிக்கை!

ஏப்ரல் மற்றும் மே மாதங்களுக்கு ஆர்டர் செய்யப்பட்ட எரிபொருள் இருப்புகளைப் பெறுவதில் எந்த தாமதமும் ஏற்படாது என்று இலங்கை பெட்ரோலியக் கூட்டுத்தாபனம் (CPC) தெரிவித்துள்ளது.

கொழும்பில் இன்று இடம்பெற்ற ஊடக சந்திப்பில் கருத்து வெளியிட்ட  CPC தலைவர் டி.ஜே. ராஜகருணா, இலங்கையின் எரிபொருள் விநியோகச் சங்கிலி மத்திய கிழக்கில் தற்போதைய மோதல் மண்டலத்திலிருந்து வரவில்லை என்று குறிப்பிட்டார்.

எனவே, இலங்கை பெட்ரோலியக் கூட்டுத்தாபனத்திற்கு எரிபொருள் விநியோகம் தடைபடாது என்று அவர் கூறினார்.

இந்தியா மற்றும் சிங்கப்பூரிலிருந்து தொடர்புடைய எரிபொருள் ஏற்றுமதிகள் வரவுள்ளதாக சுட்டிக்காட்டிய அவர்,  “நாங்கள் இந்த அறிக்கையை பொறுப்புடன் வெளியிடுகிறோம். எனவே, மக்கள் வரிசையில் காத்திருப்பதில் எந்த அர்த்தமும் இல்லை என்றுக் கூறியுள்ளார்.

இன்று (01) எரிபொருள் விநியோகிக்க நாங்கள் முதலில் திட்டமிடப்படவில்லை. இருப்பினும், அதிகரித்த பொது நுகர்வு காரணமாக, அனைத்து எரிபொருள் விநியோக ஊழியர்களையும் பணிக்குத் திரும்ப அழைத்துள்ளோம். எரிபொருள் விநியோகம் இப்போது தொடங்கப்பட்டுள்ளது. நாளை (02) போயா தினமாக இருந்தாலும், எரிபொருள் விநியோகம் தொடரும், ”என்று அவர் கூறினார்.

அனைத்து எரிபொருள் நிலையங்களும் கேன்கள் அல்லது பீப்பாய்களில் எரிபொருளை வழங்க வேண்டாம் என்று அறிவுறுத்தப்பட்டுள்ளதாகவும் CPC தலைவர் மேலும் தெரிவித்தார். மறுவிற்பனைக்காக மொத்த கொள்கலன்களில் எரிபொருள் வாங்க முயற்சிக்கும் எவருக்கும் எதிராக சட்ட நடவடிக்கை எடுக்கப்படும் என்றும் அவர் எச்சரிக்கை விடுத்துள்ளார்.