மலிவு விலை மனித உருவ ரோபோக்கள் அறிமுகம்! அதிர்ச்சியில் டெஸ்லா

செயற்கை நுண்ணறிவு மேம்பாட்டுத் தளமான ஹக்கிங் ஃபேஸ், ரோபாட்டிக்ஸ் துறையில் ஒரு புதிய புரட்சியை ஏற்படுத்தும் வகையில் 2 புதிய ரோபோக்களைச் சந்தைக்குக் கொண்டு வந்துள்ளது. இதில் முக்கியமாக, ‘ஹோப் ஜேஆர்’ (HopeJR) என்ற மனித உருவ (ஹியூமனாய்டு) ரோபோ அனைவரது கவனத்தையும் ஈர்த்துள்ளது.

பிரெஞ்சு ரோபாட்டிக்ஸ் நிறுவனமான ‘தி ரோபோட் ஸ்டுடியோ’ உடன் இணைந்து ஹக்கிங் ஃபேஸ் இந்த ரோபோவை வடிவமைத்து உருவாக்கி உள்ளது. இதன் சிறப்பம்சமே இதுஒரு ஓப்பன் சோர்ஸ் தொழில்நுட்பத்தில் இயங்குவதும், இதன் விலை சுமார் $3,000 ஆக நிர்ணயிக்கப்பட உள்ளதும் ஆகும்.

போட்டியாளர்களின் தயாரிப்புகளுடன் ஒப்பிடுகையில் இந்த மனித உருவ ரோபோவின் விலை மிகவும் குறைவு. உதாரணமாக, யூனிட்ரீ (Unitree) நிறுவனத்தின் G1 ரோபோவின் விலை $16,000 ஆகவும், எலான் மஸ்க் நிறுவனமான டெஸ்லாவின் ஆப்டிமஸ் ஜென் 2 (Optimus Gen 2) மனித உருவ ரோபோ விலை $20,000 ஆகவும் இருக்கும் என எதிர்பார்க்கப்படுகிறது. இத்தகைய சூழலில், ஹக்கிங் ஃபேஸின் ஹோப்ஜேஆர் மிகவும் குறைந்த விலையில் கிடைப்பது குறிப்பிடத்தக்கது.

இந்த செய்தியை ஆங்கிலத்தில் படிக்க

இதுகுறித்து ஹக்கிங் ஃபேஸ் தலைமைச் செயல் அதிகாரி கிளெம் டெலாங் ‘டெக்கிரஞ்ச்’ (TechCrunch) செய்தி நிறுவனத்திடம் பேசுகையில், “இந்த ரோபோ ஓப்பன் சோர்ஸ் என்பதுதான் முக்கியமான அம்சம். இதன் மூலம் யார் வேண்டுமானாலும் இவற்றை அசெம்பிள் செய்யவும், மீண்டும் உருவாக்கவும், இவை எப்படி செயல்படுகின்றன என்பதைப் புரிந்துகொள்ளவும் முடியும். மேலும், இவை குறைந்த விலையில் கிடைப்பதால், ரோபாட்டிக்ஸ் துறையானது ஒருசில பெரிய நிறுவனங்களின் ‘ஆபத்தான பிளாக்-பாக்ஸ்’ (dangerous black-box systems) அமைப்புகளால் மட்டும் ஆதிக்கம் செலுத்தப்படுவதைத் தடுக்க முடியும்” என்று கூறினார்.

இந்த முயற்சி, ரோபாட்டிக்ஸ் தொழில்நுட்பத்தை பரவலாக்கவும், ஆராய்ச்சியாளர்கள் மற்றும் உருவாக்குநர்கள் குறைந்த செலவில் மனித உருவ ரோபோக்களை அணுகவும் வழிவகுக்கும் என எதிர்பார்க்கப்படுகிறது.

ஜெனரேட்டிவ் செயற்கை நுண்ணறிவு (Generative AI) புரட்சியின் உந்துதலால், ரோபாட்டிக்ஸ் துறை தற்போது புதுப்பிக்கப்பட்ட ஆர்வத்தை கண்டு வரும் நேரத்தில் இந்த அறிவிப்பு வெளியாகியுள்ளது. இருப்பினும், நிஜ உலக சூழல்களில் மனித உருவ ரோபோக்களை நம்பகத்தன்மையுடன் பணியமர்த்துவதற்கு முன்பு தொழில்நுட்ப சவால்களை எதிர்கொள்ள வேண்டியுள்ளது.

பேட்டரி ஆயுள் ஒரு முக்கியமான சவாலாக உள்ளது. உதாரணமாக, ‘அர்ஸ் டெக்னிகா’ (ArsTechnica) அறிக்கையின்படி, யூனிட்ரீயின் G1 ரோபோ ஒருமுறை சார்ஜ் செய்தால் 2 மணிநேரம் மட்டுமே இயங்கும். மறுபுறம், ஹக்கிங் ஃபேஸின் ஹோப்ஜேஆர், 66-க்கும் மேற்பட்ட actuated degrees of freedom கொண்டுள்ளது. இதன் மூலம் அது நடக்கவும், பொருட்களைக் கையாளவும் (manipulate) திறன் பெற்றுள்ளது என்று ஹக்கிங் ஃபேஸின் முதன்மை ஆராய்ச்சி விஞ்ஞானியான ரெமி கேடேன் (Remi Cadene) தெரிவித்துள்ளார். கேடேன் இதற்கு முன்பு டெஸ்லா நிறுவனத்தில், அந்த மின்சார வாகன தயாரிப்பாளரின் ஆப்டிமஸ் மனித உருவ ரோபோ திட்டத்தில் பணியாற்றியவர் என்பது குறிப்பிடத்தக்கது.

இருப்பினும், ஹோப்ஜேஆர் ரோபோ தற்போதைக்கு முழுமையான autonomous movement கொண்டிருக்கவில்லை எனத் தெரிகிறது. அதன் prototype பின்னால் ஒருநபர் இருந்து அதனை ‘ரிமோட் மூலம் உதவி’ செய்வது (remote-assisting) தெளிவாகக் காணப்படுவதே இதற்குக் காரணம்.

ஹோப்ஜேஆர் மட்டுமல்லாமல், ‘ரீச்சி மினி’ (Reachy Mini) என்ற மற்றொரு ரோபோவையும் இந்த செயற்கை நுண்ணறிவு மற்றும் இயந்திர கற்றல் தளம் உருவாக்கியுள்ளது. இது டிஸ்னியின் புகழ்பெற்ற அனிமேஷன் படமான Wall-E கதாபாத்திரங்களில் ஒன்றைபோல தோற்றமளிக்கிறது. ரீச்சி மினியும் ஓப்பன் சோர்ஸ் தயாரிப்பாகும். இது செயற்கை நுண்ணறிவு பயன்பாடுகளை சோதித்துப் பார்க்க வடிவமைக்கப்பட்டுள்ளது. இது ஒரு desktop unit ஆகும். இது பேசவும், கேட்கவும் மற்றும் தலையை அசைக்கவும் திறன் கொண்டது. ரீச்சி மினியின் விலை $250 (சுமார் ₹20,800) முதல் $300 (சுமார் ₹25,000) வரை இருக்கும் என எதிர்பார்க்கப்படுகிறது.

இந்த 2 மனித உருவ ரோபோக்களின் விற்பனை எப்போது தொடங்கும் என்பதற்கான குறிப்பிட்ட காலக்கெடுவை ஹக்கிங் ஃபேஸ் வழங்கவில்லை என்றாலும், ஹோப்ஜேஆர் மற்றும் ரீச்சி மினி ஆகியவற்றை முதலில் வாங்குபவர்களின் காத்திருப்புப் பட்டியல் தற்போது திறக்கப்பட்டுள்ளது என்று அதன் தலைமைச் செயல் அதிகாரி தெரிவித்ததாகக் கூறப்படுகிறது.

கடந்த காலங்களில், ஹக்கிங் ஃபேஸ் ரோபோக்களை இயக்குவதற்காக வடிவமைக்கப்பட்ட பல்வேறு செயற்கை நுண்ணறிவு மாதிரிகளையும், 3D-printable robotic arms-ஐயும் வெளியிட்டுள்ளது. மேலும், ஆண்டின் தொடக்கத்தில் பிரான்ஸை தளமாகக் கொண்ட மனித உருவ ரோபாட்டிக்ஸ் நிறுவனமான Pollen Robotics நிறுவனத்தை, ஹக்கிங் ஃபேஸ் கையகப்படுத்தியதாக தகவல்கள் தெரிவிக்கின்றன. இந்த நடவடிக்கைகள், ரோபாட்டிக்ஸ் தொழில்நுட்பத்தை பரவலாக்கவும், ஆராய்ச்சியாளர்கள் மற்றும் உருவாக்குநர்கள் குறைந்த செலவில் அதிநவீன கருவிகளை அணுகவும் ஹக்கிங் ஃபேஸ் மேற்கொண்டுள்ள முயற்சிகளை காட்டுகின்றன.