பிளே ஆப் செல்ல மும்பை – டெல்லி இடையே கடுமையான போட்டி

ஐபிஎல் 2025 மெல்ல மெல்ல இறுதிக்கட்டத்தை எட்டி வருகிறது. ஏற்கனவே, 3 அணிகள் பிளே ஆப் சுற்றுக்கு தகுதிபெற்றுவிட்ட நிலையில், இன்னும் ஒரே ஒரு அணி மட்டுமே தகுதிபெற உள்ளது. அந்த 4-வது இடத்திற்கு தான் மும்பை இந்தியன்ஸ் மற்றும் டெல்லி கேப்பிடல்ஸ் இடையே கடுமையான போட்டி நடக்கிறது, ஏனெனில் ஒரே ஒரு இடம் மட்டுமே காலியாக உள்ளது.

இன்று மும்பையில் உள்ள வான்கடே மைதானத்தில் இந்த இரு அணிகளும் மோதுகின்றன, இது நான்காவது பிளே ஆஃப் இடத்தை தீர்மானிக்கும் முக்கிய ஆட்டம். இதுவரை குஜராத் டைட்டன்ஸ், ராயல் சேலஞ்சர்ஸ் பெங்களூரு, மற்றும் பஞ்சாப் கிங்ஸ் ஆகிய மூன்று அணிகள் பிளே ஆஃப் சுற்றுக்கு தகுதி பெற்றுவிட்டன, லக்னோ சூப்பர் ஜெயன்ட்ஸ் உட்பட ஐந்து அணிகள் வெளியேறிவிட்டன.

மும்பை இந்தியன்ஸ் 12 ஆட்டங்களில் 14 புள்ளிகளுடனும், சிறந்த நிகர ரன் ரேட்டுடனும் (+1.156) உள்ளது, மேலும் இவர்களுக்கு டெல்லி மற்றும் பஞ்சாப் கிங்ஸ் உடனான இரு ஆட்டங்கள் மீதமுள்ளன. டெல்லி கேப்பிடல்ஸ் 12 ஆட்டங்களில் 13 புள்ளிகளுடனும், +0.260 நிகர ரன் ரேட்டுடனும் உள்ளது, இவர்களுக்கும் மும்பை மற்றும் பஞ்சாப் உடனான இரு ஆட்டங்கள் உள்ளன. மும்பை இன்று டெல்லியை வீழ்த்தினால், 16 புள்ளிகளுடன் பிளே ஆஃப் உறுதியாகிவிடும், டெல்லி வெளியேறும், ஏனெனில் அவர்கள் அதிகபட்சம் 15 புள்ளிகளை மட்டுமே எட்ட முடியும்.

ஆனால், டெல்லி மும்பையை வென்றால், 15 புள்ளிகளை எட்டி, பஞ்சாப் கிங்ஸுக்கு எதிரான அடுத்த ஆட்டத்தில் வென்றால் மட்டுமே பிளே ஆஃப் வாய்ப்பு உயரும். மும்பையின் நிகர ரன் ரேட் சிறப்பாக இருப்பதால், புள்ளிகள் சமமானால் அவர்களுக்கு வாய்ப்புகள் இருக்கிறது. ஏற்கனவே, ஏப்ரல் 13 அன்று மும்பை டெல்லியை 12 ரன்களில் வீழ்த்தியது, ஆனால் டெல்லியின் வீரர்கள் இப்போது சிறப்பான பார்மில் உள்ளார்கள்.

அதே சமயம் மும்பை வீரர்களும் அதிரடியான பார்மில் உள்ளனர். எனவே, இன்று நடைபெறவுள்ள இந்த போட்டி இரண்டு அணிகளுக்கும் சவாலான போட்டியாக இருக்கும் என எதிர்பார்க்கப்படுகிறது. டெல்லியை வீழ்த்தி மும்பை அணி பிளே ஆப் செல்லும் வாய்ப்பை உறுதிசெய்யுமா என்பதை பொறுத்திருந்து பார்ப்போம்.