ஆப்பிள் ஐபோன் 17 ப்ரோ மேக்ஸ் தொடர்பில் கசிந்த தகவல்

பெரும்பாலான ஸ்மார்ட்போன் தயாரிப்பு நிறுவனங்கள் மெல்லிய வடிவமைப்பை நோக்கிச் சென்று கொண்டிருக்கும் இந்த காலத்தில், ஆப்பிள் நிறுவனம் ஐபோன் 17 ப்ரோ மேக்ஸில் நீண்ட பேட்டரி ஆயுளுக்கு முன்னுரிமை அளிப்பதாகத் தெரிகிறது.

சீன மைக்ரோ பிளாக்கிங் தளமான வெய்போவில் “இன்ஸ்டன்ட் டிஜிட்டல்” என்ற பயனர் வெளியிட்ட தகவல்களின்படி, ஐபோன் 17 ப்ரோ மேக்ஸ் 5,000mAh பேட்டரியுடன் வெளிவரக் கூடும் என்று குறிப்பிட்டுள்ளார். இது ஐபோன் 16 ப்ரோ மேக்ஸில் உள்ள 4,676mAh பேட்டரியை விட பெரியது. இந்த அதிகரித்த பேட்டரி திறனைச் சேர்ப்பதற்காக, ஆப்பிள் இந்தப்போனின் வடிவமைப்பை சற்று தடிமனாக மாற்றியிருக்கலாம். ஐபோன் 17 ப்ரோமேக்ஸ் சுமார் 8.725 மிமீ தடிமன் கொண்டதாக இருக்கும் என்று எதிர்பார்க்கப்படுகிறது. இது ஐபோன் 16 ப்ரோ மேக்ஸை விட (8.25 மிமீ) சற்று அதிகம்.

இந்தப் புதிய பேட்டரி மற்றும் மேம்படுத்தப்பட்ட A19 ப்ரோ சிப்பில் உள்ள செயல்திறன் மேம்பாடுகளின் காரணமாக, ஐபோன் 17 ப்ரோ மேக்ஸ் சுமார் 35 மணிநேரம் வரை பேட்டரி ஆயுளை வழங்கும் என்று கூறப்படுகிறது. இது தற்போதைய ப்ரோ மேக்ஸ் மாடலை விட மிக நீண்ட நேரம் நீடிக்கும் போனாக அமையும்.

ஐபோன் 17 ப்ரோ மேக்ஸ், அதன் பெரிய பேட்டரி மூலம், ஒருமுறை சார்ஜ் செய்தால் நாள் முழுவதும் அல்லது அதற்கும் மேலாக நீடிக்கும் வகையில், அதிக நேரம் தங்கள் தொலைபேசியைப் பயன்படுத்தும் பயனர்களுக்கு ஒரு சிறந்த தேர்வாக இருக்கும். ப்ரோ மாடல்களைப் பொறுத்தவரை, ஆப்பிள் டைட்டானியத்தில் இருந்து அலுமினியத்திற்கு மாறுவதைக் கருத்தில் கொள்ளலாம், இது நீடித்துழைப்பை அதிகரிக்கும் நோக்கத்தில் இருக்கலாம். அறிக்கைகளின்படி, ஐபோன் 17 ப்ரோ மற்றும் ஐபோன் 17 ப்ரோ மேக்ஸ் ஆகியவை ஃபோனின் அகலம் முழுவதும் பரவும் வகையில் கிடைமட்டமாக அமைக்கப்பட்ட கேமரா அமைப்பை கொண்டிருக்கும். இந்த சீரிஸிலுள்ள மற்ற மாடல்களும் மறுவடிவமைப்பு செய்யப்பட்ட கேமரா அமைப்பைப் பின்பற்றும் என்று எதிர்பார்க்கப்படுகிறது.