ரஷ்யாவை அதிரவைத்த நிலநடுக்கம் – உலக நாடுகள் பலவற்றிற்கு சுனாமி அச்சுறுத்தல்

ரஷ்யாவில் ஏற்பட்ட சக்திவாய்ந்த நிலநடுக்கத்தையடுத்து, ரஷ்யா மற்றும் ஜப்பான் கடலோரப் பகுதிகளில் சுனாமி அலைகள் தாக்கம் ஏற்பட்டுள்ளது.

நிலநடுக்கத்தினால் கடலடி நிலத்தின் பெரிய மாற்றங்கள் ஏற்பட்டுள்ளன, இதனால் பல நாடுகள் மீது சுனாமி அச்சுறுத்தல் விடுக்கப்பட்டுள்ளது.

சீனாவின் கடலோரப் பகுதிகளுக்கும் சுனாமி அபாயம் இருப்பதாக அதிகாரப்பூர்வ எச்சரிக்கைகள் விடுக்கப்பட்டுள்ளன.

பொதுமக்கள் பாதுகாப்பான உயரமான பகுதிகளுக்கு செல்லுமாறு அறிவுறுத்தப்பட்டுள்ளனர். அதேபோல், தென் அமெரிக்காவில் உள்ள பெரு மற்றும் ஈக்வடார் நாடுகளும் சுனாமி அலைகளால் பாதிக்கப்படலாம் என தெரிவிக்கப்பட்டுள்ளது.

அமெரிக்காவின் வடக்கு கலிபோர்னியாவிலும் சுனாமி எச்சரிக்கை நிலுவையில் உள்ளது. கிரசென்ட் சிட்டி மற்றும் யுரேகா போன்ற நகரங்களில் உள்ள மக்கள், கடலோர பகுதிகளை விட்டு விலகி, பாதுகாப்பான இடங்களுக்குச் செல்லுமாறு அவசரகால சேவைகள் அறிவுறுத்தியுள்ளன.

அனைத்து சுனாமி எச்சரிக்கை பகுதிகளிலும் உள்ள பொதுமக்கள் பீதியடைய வேண்டாம், ஆனால் அரசு மற்றும் அவசர சேவை அதிகாரிகள் வழங்கும் அறிவுறுத்தல்களை தவறாமல் பின்பற்ற வேண்டும் என வலியுறுத்தப்படுகிறது.

கடற்கரையோர பகுதிகள், ஆறுகள், முகத்துவாரப் பகுதிகளில் இருந்து உடனடியாக விலகி, உயரமான இடங்களை நாடவும். மீனவர்கள் கடலுக்குச் செல்லக் கூடாது என்றும், கடலில் உள்ள படகுகளை பாதுகாப்பான இடங்களில் நிறுத்துமாறும் அறிவுறுத்தப்பட்டுள்ளது.

இந்நிலையில், நிலநடுக்கத்தால் ஏற்படும் பிந்தைய தாக்கங்களை தொடர்ந்து கண்காணிக்க சர்வதேச சுனாமி மையங்கள் வலுக்கட்டாய நடவடிக்கைகளை மேற்கொண்டு வருகின்றன.