ருமேனியாவில் தொழில் பெற்றுத்தருவதாக கூறி பணமோசடி!

முறையான அனுமதிப்பத்திரம் இன்றி ருமேனியாவில் வேலை வாங்கித் தருவதாகக் கூறி 83 இலட்சம் ரூபாவுக்கும் அதிகமான தொகையை மோசடி செய்த நபர் ஒருவரை  இலங்கை வெளிநாட்டு வேலைவாய்ப்புப் பணியகம் கைது செய்துள்ளது.

இலங்கை வெளிநாட்டு வேலைவாய்ப்புப் பணியகத்தின் விசேட புலனாய்வுப் பிரிவினரால் கடந்த 16ஆம் திகதி குறித்த நபர் கைது செய்யப்பட்டுள்ளார்.

இராஜகிரிய, கலப்பலுவாவ, புட்கமுவ வீதியைச் சேர்ந்த சலாஹுதீன் மொஹமட் நவஸ்தீன் என்ற சந்தேக நபர் ருமேனியாவில் தொழில் பெற்றுத்தருவதாகக் கூறி 813,000 ரூபாவை பெற்றுக்கொண்டதாகவும், அவர் வாக்குறுதியளித்தபடி வேலை வழங்கவில்லை எனவும் பணியகத்திற்கு முறைப்பாடு கிடைத்துள்ளது.

இந்த முறைப்பாட்டிற்கு மேலதிகமாக சந்தேகநபருக்கு எதிராக பணியகத்திற்கு 9 முறைப்பாடுகள் கிடைத்துள்ளதுடன்,   8,390,000 ரூபாவை மோசடி செய்துள்ளதாகவும் தெரிவிக்கப்பட்டுள்ளது.

இதனையடுத்து கைது செய்யப்பட்ட அவர்,   கடுவெல நீதவான் நீதிமன்றில் ஆஜர்படுத்தப்பட்டு தலா 5 இலட்சம் ரூபாய் பெறுமதியான 3 சரீரப் பிணைகளில் விடுவிக்கப்பட்டுள்ளார்.

மேலதிக விசாரணைகள் வரும் மார்ச் மாதம் 11.2024 ஆம் திகதி நடைபெறவுள்ளது.