டெல்லியில் நச்சுப் புகைமூட்டம்; விமானம், ரயில் சேவை மற்றும் அதிகமானோர் மூச்சுப் பிரச்சினையால் பாதிப்பு

இந்தியத் தலைநகர் புதுடெல்லியும் அதனைச் சுற்றியுள்ள பல நகரங்களும் வியாழக்கிழமையன்று (நவம்பர் 14) கடும் நச்சுப் புகைமூட்டத்தால் பாதிக்கப்பட்டன.அதன் காரணமாக விமான, ரயில் சேவைகளுக்கு இடையூறுகள் ஏற்பட்டன. இருமல், மூச்சுப் பிரச்சினைக்கு ஆளானதாகக் குடியிருப்பாளர்கள் பலர் தெரிவித்துள்ளனர்.

மருத்துவமனையில் காற்றுத் தூய்மைக்கேடு தொடர்பிலான சுகாதாரப் பிரச்சினைகளுக்கு ஆளாகும் நோயாளிகளின் எண்ணிக்கை தொடர்ந்து அதிகரித்து வருவதாகவும் தெரிவிக்கப்பட்டுள்ளது.

வியாழக்கிழமையன்று டெல்லியின் சராசரி காற்றுத் தூய்மைக்கேட்டுக் குறியீடு (AQI – ஏகியூஐ) தொடர்ந்து 400க்கு மேல் பதிவானது. டெல்லியின் பத்பர்கஞ் பகுதி ஆக அதிகம் பாதிக்கப்பட்ட பகுதி என்று காற்றுத் தூய்மைக்கேட்டைக் கணிக்கும் ‘சமீர்’ எனும் செயலியில் தெரிய வந்தது.

உள்ளூர் நேரப்படி வியாழக்கிழமை காலை 11 மணி நிலவரப்படி அப்பகுதியின் மாசுக் குறியீடு 470ஆகப் பதிவானது. ஆனந்த் விஹார், அ‌ஷோக் விஹார் உள்ளிட்ட பகுதிகளிலும் நிலைமை கிட்டத்தட்ட அதே அளவு மோசமாக இருந்தது.

இந்நிலையில், டெல்லி ஒரு நச்சு வாயுக் கூடத்தைப் போல் இருப்பதாக காங்கிரஸ் கட்சியின் பொதுச் செயலாளர் பிரியங்கா காந்தி கூறியுள்ளார்.

“மாசுக் குறியீடு 35ஆக இருந்த, மிகத் தூய்மையான காற்று இருக்கும் வயநாட்டிலிருந்து டெல்லி திரும்பும்போது நச்சு வாயுக் கூடத்துக்குள் நுழைவதுபோல் உள்ளது. உயரத்திலிருந்து பார்க்கும்போது புகைமூட்டம் மேலும் அதிர்ச்சி தருகிறது,” என்று பிரியங்கா காந்தி எக்ஸ் சமூக ஊடகத் தளத்தில் பதிவிட்டார்.

“டெல்லியின் காற்றுத் தூய்மைக்கேடு ஆண்டுதோறும் மோசமடைந்து வருகிறது. சுத்தமான காற்றுக்காக நாம் அனைவரும் ஒன்றுசேர்ந்து தீர்வுகாணவேண்டும். இது, தனிப்பட்ட கட்சிகள் சார்ந்த பிரச்சினையன்று. குறிப்பாக சிறார், மூத்தோர், சுவாசப் பிரச்சினை இருப்போர் ஆகியோரால் மூச்சுவிட முடியாது. இதற்கு ஏதாவது செய்தே தீரவேண்டும்,” என்றும் அவர் குறிப்பிட்டார்.

தொடர்புடைய செய்திகள்:

இலங்கை பாராளுமன்றத்தின் புதிய சார்ஜென்ட் நியமனம் கோட்டாபயவின் புத்தகம் மீது கவனம் செலுத்தியுள்ள ரஷ்யா பாலியல் பலாத்கார குற்றச்சாட்டு – நேபாள கிரிக்கெட் வீரர் விடுதலை பிரித்தானியாவில் அடமான விகிதக் குறைப்பு – கடன் வாங்கும் அழுத்தம் நீடிப்பு லண்டனிலிருந்து யாழ் வந்த முதியவரின் திருவிளையாடல் ஜெர்மனியில் எரிவாயு கட்டணத்தில் ஏற்படவுள்ள பாரிய அதிகரிப்பு