இலங்கையில் தனியார் மருத்துவக் கல்லூரிகளை நிறுவுவது தொடர்பில் முடிவை அறிவிக்க அரசாங்கத்திற்கு கால அவகாசம்!
தனியார் மருத்துவக் கல்லூரிகளை நிறுவுவது தொடர்பான தனது நிலைப்பாட்டைத் தெரிவிக்க மருத்துவ பீட மாணவர் நடவடிக்கைக் குழு அரசாங்கத்திற்கு இரண்டு வார கால அவகாசம் அளித்துள்ளதாக அதன் ஒருங்கிணைப்பாளர் ரவிடு சச்சிந்தா தெரிவித்தார்.
அந்த இரண்டு வார காலத்திற்குள் தொடர்புடைய அமைச்சரவை முடிவுகளை ரத்து செய்ய அரசாங்கத்திற்கும் நேரம் இருப்பதாக அவர் மேலும் சுட்டிக்காட்டுகிறார்.
பிரதமர் ஹரிணி அமரசூரியவிற்கும் மருத்துவ பீட மாணவர் நடவடிக்கைக் குழுவிற்கும் இடையில் நேற்று (06) நடைபெற்ற கலந்துரையாடலின் பின்னர் ஊடகங்களுக்கு கருத்து தெரிவித்த அவர் இவ்வாறு கூறியுள்ளார்.
இதன்போது மேலும் கருத்து வெளியிட்டுள்ள அவர், “இந்த விவாதத்தில், மருத்துவ பீட மாணவர் நடவடிக்கைக் குழுவாக எங்கள் நிலைப்பாட்டை நாங்கள் விளக்கினோம்.
அமைச்சரவை முடிவுகளை ரத்து செய்ய அரசாங்கத்திற்கு 2 வாரங்கள் அவகாசம் அளித்தோம். மேலும், தனியார் மருத்துவக் கல்லூரிகளை நிறுவுவது குறித்து அரசாங்கத்தின் நிலைப்பாடு என்ன என்பதை நாட்டிற்குச் சொல்லுங்கள்.” எனத் தெரிவித்துள்ளார்.
பல கோரிக்கைகளை வலியுறுத்தி, மருத்துவ பீட மாணவர்கள் நேற்று பிற்பகல் கோட்டை ரயில் நிலையத்திற்கு முன்பாக ஆர்ப்பாட்டத்தில் ஈடுபட்டனர்.
பின்னர் அவர்கள் ஆர்ப்பாட்ட பேரணியாக ஜனாதிபதி செயலகம் நோக்கி பேரணியாகச் சென்றபோது, ஓல்காட் மாவத்தை மற்றும் அதைச் சுற்றியுள்ள சாலைகளில் கடும் போக்குவரத்து நெரிசல் ஏற்பட்டது.
பின்னர் அவர்களுக்கு பிரதமர் ஹரிணி அமரசூரியவுடன் கலந்துரையாட வாய்ப்பு வழங்கப்பட்டது.
(Visited 2 times, 2 visits today)
