600,000 போதை மாத்திரைகளுடன் 44 வயது மன்னார் நபர் கைது

இளைஞர்கள் மற்றும் பாடசாலை மாணவர்களை இலக்கு வைத்து விற்பனை செய்யப்பட்டதாக சந்தேகிக்கப்படும் 60 மில்லியன் பெறுமதியான 600,000 மருந்து மாத்திரைகளுடன் 44 வயது நபர் ஒருவர் இலங்கை கடற்படை மற்றும் பொலிஸ் விசேட அதிரடிப்படையினரால் கைது செய்யப்பட்டுள்ளார்.

சந்தேக நபர் மன்னார் பகுதியைச் சேர்ந்தவர் என அடையாளம் காணப்பட்டுள்ளார்.

மேலதிக விசாரணைகளின் விளைவாக பொரளை பிரதேசத்தில் போதைப்பொருள் கடத்தலுக்கு பயன்படுத்தப்பட்ட லொறி ஒன்று கைப்பற்றப்பட்டுள்ளது.

கடற்படை புலனாய்வுப் பிரிவினருக்கு கிடைத்த தகவலின் அடிப்படையில் கைது செய்யப்பட்டுள்ளார். பொலிஸ் விசேட அதிரடிப்படையினருடன் இணைந்து இலங்கை கடற்படையினரால் தேடுதல் நடவடிக்கை மேற்கொள்ளப்பட்டது.

சந்தேகநபர், பரிந்துரைக்கப்பட்ட மருந்து மாத்திரைகள் மற்றும் லொறியுடன் மேலதிக சட்ட நடவடிக்கைகளுக்காக கொழும்பு பொலிஸ் போதைப்பொருள் பணியகத்திடம் ஒப்படைக்கப்பட்டார்.