இன்று காலை பத்தரமுல்லையில் உள்ள குடிவரவு குடியகல்வு திணைக்கள அலுவலகத்திற்கு கடவுச்சீட்டுகளை பெற்றுக் கொள்வதற்காக மக்கள் வந்திருந்தனர். இந்நிலையில் குறிப்பிட்ட திகதி மற்றும் நேரத்தை பெற்றுக்கொண்டவர்களுக்கு மட்டுமே இன்று வாய்ப்பு வழங்கப்படும் என அறிவிக்கப்பட்டதால் அங்கு பரபரப்பு ஏற்பட்டது. இதன் காரணமாக குடிவரவு குடியகல்வு திணைக்களத்திற்கு முன்பாக நீண்ட வரிசைகளும் நெரிசலும் காணப்பட்டதுடன் பொலிஸாருக்கும் கலகத் தடுப்புப் பிரிவினருக்கும் அழைப்பு விடுக்கப்பட்டமை குறிப்பிடத்தக்கது.

ஜப்பானில் தொழில்நுட்ப துறையில் இலங்கை பட்டதாரிகளுக்கு தொழில் வாய்ப்புகளை வழங்க தயாராக இருப்பதாக ஜப்பானிய பிரதிநிதிகள் தெரிவித்துள்ளனர். ஜனாதிபதி ரணில் விக்கிரமசிங்கவுடனான சந்திப்பின் போதே அவர் இவ்வாறு தெரிவித்தார். ஜப்பானின் மின்சார விநியோகத் துறையை மேம்படுத்தும் நோக்கில், தனியார் துறையில் வேலை வாய்ப்புக்காக இத்தகைய பட்டதாரிகள் சேர்த்துக் கொள்ளப்பட உள்ளனர். ஜப்பானிய தூதுக்குழுவின் தலைவர் கலாநிதி இசுமி ஹிரோடோ, ஜனாதிபதியை சந்தித்த போதே இந்தக் கருத்துக்களை வெளியிட்டதாக ஜனாதிபதி ஊடகப் பிரிவு தெரிவித்துள்ளது.