அமெரிக்கா-மலேசியா இடையே வர்த்தக ஒப்பந்தம் கையெழுத்து

அமெரிக்காவுக்கும் மலேசியாவுக்கும் இடையே வரலாற்றுச் சிறப்புமிக்க வர்த்தக ஒப்பந்தம் கைகெழுத்தாகியுள்ளது. அமெரிக்காவுக்கு அரிய கனிமங்களை ஏற்றுமதி செய்ய இந்த ஒப்பந்தம் வகை செய்யும்.

47வது ஆசியான் உச்சநிலை மாநாட்டில் பங்கேற்பதற்காக அமெரிக்க ஜனாதிபதி டொனால்ட் ட்ரம்ப் கோலாலம்பூர் வந்துள்ளார். இதன் ஒரு பகுதியாக வர்த்தக ஒப்பந்தத்தில் மலேசியப் பிரதமர் அன்வார் இப்ராகிமுடன்(Anwar Ibragi) அவர் கையெழுத்திட்டார்.

இந்த ஒப்பந்தத்தில் அன்வார் இப்ராகிமின் நிர்வாகம் மேற்கொண்ட பல சலுகைககள் உள்ளடங்கியிருக்கின்றன. அவற்றில் அமெரிக்காவுக்கு கனிமங்களை ஏற்றுமதி செய்வதும் அடங்கும்.

அமெரிக்காவுக்கும் சீனாவுக்கும் இடையே நவீன தொழில்நுட்ப விநியோகச் சங்கிலியை(Supply chain) மையமாகக் கொண்டு பேச்சுவார்த்தை நடைபெற்று வரும் வேளையில் இந்த ஒப்பந்தம் கையெழுத்தாகியுள்ளது.

மலேசியாவுடனான ஒப்பந்தம் இருதரப்பிலும் முக்கியமான கனிமங்களில் வர்த்தக முதலீட்டை உறுதி செய்கிறது என்று அமெரிக்க வர்த்தகப் பிரதிநிதி ஜேமிசன் கிரீயர்(Jamieson Greer) கூறியுள்ளார்.

“நமது தொழில்துறைக்கும் தொழில்நுட்பத்துக்கும் நமது பொருளியலுக்கும் மிக முக்கியமான கனிமங்களைக் கொண்டுள்ள உலகில் வாழ்ந்து வருகிறோம். அந்த வகையில் நம்மிடையே இதற்கான ஒத்துழைப்பும் அவசியமாகிறது. இது, ஒருவருக்கு ஒருவர் சுமூகமான விநியோகச் சங்கிலியை உறுதி செய்ய உதவுகிறது,” என்றும் அவர் குறிப்பிட்டார்.