விரைவான (Fast-track ) குடியுரிமை திட்டத்தை இரத்து செய்த ஜெர்மனி! சிக்கலில் புலம்பெயர்ந்தோர்!

ஜெர்மனியில் புலம்பெயர்ந்தோருக்கான விரைவான (Fast-track )  குடியுரிமைத் திட்டத்தை அந்நாட்டு நாடளுமன்றம் இரத்து செய்துள்ளது.

கடந்த 2024 ஆம் ஆண்டு வெளிநாட்டு தொழிலாளர்களை ஈர்க்கும் நோக்கத்துடன் அப்போது ஆட்சியில் இருந்த ஓலாஃப் ஷோல்ஸ் (Olaf Scholz) தலைமையிலான அரசாங்கம் குடியேற்ற கொள்கைகளில் மாற்றங்களை கொண்டுவந்திருந்தது.

இதன்கீழ் ஜெர்மனியில் வாழும் புலம்பெயர்ந்தோர் 05 ஆண்டுகளுக்கு பதிலாக மூன்று ஆண்டுகளிலேயே குடியுரிமைக்கு விண்ணப்பிக்க முடியும்.

இருப்பினும் தற்போது ஆட்சியில் உள்ள பிரீட்ரிக் மெர்ஸ் (Friedrich Merz) தலைமையிலான அரசாங்கம் கடுமையான குடியேற்றக் கொள்கைகளை அமுல்படுத்தி வருகிறது. இதற்கமைய இந்த விரைவான குடியுரிமை திட்டத்தை இரத்து செய்துள்ளது.

நாடாளுமன்றத்தின் கீழ் சபையின் 450 உறுப்பினர்கள் இதற்கு ஆதரவாக வாக்களித்துள்ளனர். அத்துடன் 134 பேர் எதிராக வாக்களித்துள்ளனர், மேலும் இரண்டு பேர் வாக்களிக்கவில்லை.

ஜெர்மனியின் தற்போதைய சென்சலரான பிரீட்ரிக் மெர்ஸ் (Friedrich Merz) தனது தேர்தல் பிரசாரங்களில் புலம்பெயர்வோரை கட்டுப்படுத்துவதை முக்கிய வாக்குறுதியாக குறிப்பிட்டிருந்தார். இதற்கமைய தற்போதைய நகர்வுகளை அவர் முன்னெடுத்துள்ளார்.

இதேவேளை  சென்சலர் மெர்ஸின் கடுமையான நிலைப்பாடு புகலிடம் கோருபவர்களின் எண்ணிக்கையை வெகுவாகக் குறைத்துள்ளது.

ஜெர்மனியில் 2025 ஆம் ஆண்டில் இதுவரை சட்டவிரோத இடம்பெயர்வு உள்ளீடுகள் 22,170 ஆகக் குறைந்துள்ளது. இது 2024 ஆம் ஆண்டில் இதே காலகட்டத்துடன் ஒப்பிடும்போது 83,572 ஆகவும் 2023 இல் 127,549 ஆகவும் பதிவாகியிருந்தமை குறிப்பிடத்தக்கது.