ஒருவழியாக திரைக்கு வரும் ஜனநாயகன் திரைப்படம்! எப்போது தெரியுமா?

நடிகர் விஜயின் கடைசி திரைப்படமான ஜனநாயகன் திரைப்படம் சர்ச்சைகளை தாண்டி வெளியீட்டிற்கு வரவுள்ளதாக கூறப்படுகிறது.

கடந்த ஜனவரி மாதம் 09 ஆம் திகதி திரைக்கு வரவிருந்த இந்த படம் சென்சார் சான்றிதழ் இழுபறியால் தள்ளிப்போனது.

இந்நிலையில் படக்குழுவினர் சென்சார் சான்றிதழை பெறுவதற்கான நீதிமன்றத்தை நாடினர்.  முதலில் தனி நீதிபதி படத்தை வெளியிடலாம் என்று உத்தரவு பிறப்பித்தார்.

பின்னர் சென்சார் வாரியம் அதனை எதிர்த்து மேன்முறையீடு செய்தது. பிறகு இரண்டு நீதிபதிகள் கொண்ட அமர்விற்கு ஜனநாயகன் விவகாரம் சென்றது.

நீண்ட நேரம் நடந்த விசாரணையில், சென்சார் வாரியத்திற்கு போதுமான அவகாசம் கொடுக்கவில்லை என்றும், மீண்டும் தனி நீதிபதியிடம் விசாரணை நடைபெறும் என்றும் தீர்ப்பு வழங்கினர்.

இதனை தொடர்ந்து படம் வெளியாகுமா? ஆகாதா? என்ற சந்தேகம் ரசிகர்கள் மத்தியில் நிலவியது. இதற்கிடையே   படத்தை வாங்கிய விநியோகஸ்தர்கள், ஜனநாயகன் பட தயாரிப்பாளருடன் பேச்சு வார்த்தை நடத்தி கொடுத்த பணத்தை திருப்பிக் கேட்டதாகவும் கூறப்படுகிறது.

இந்நிலையில் தற்போது படக்குழுவினர் வழக்கை வாபஸ் பெற்று,  சென்சார் வாரியம் கூறிய வழிகளை பின்பற்றி படத்தை திரையிட முடிவு செய்துள்ளதாக தகவல் வெளியாகியுள்ளது.

இதற்கமைய இந்த படம் வரும் பெப்ரவரி மாதம் திரைக்கு வரும் என எதிர்பார்க்கப்படுகிறது.