‘ஜனநாயகன்’ குறித்து மாஸ் அப்டேட் கொடுத்த பூஜா ஹெக்டே

எச்.வினோத் இயக்கத்தில் விஜய் நடித்து வரும் 69-வது திரைப்படம் தான் ‘ஜனநாயகன்’. எச்.வினோத் ஏற்கனவே ‘தீரன் அதிகாரம் ஒன்று’, ‘நேர்கொண்ட பார்வை’, ‘வலிமை’ போன்ற படங்களை இயக்கியிருக்கிறார்.

தனது படங்களின் மூலம் எதார்த்தமான கதைக்களங்கள் மற்றும் சமூகப் பிரச்சினைகளை கையாளுவதில் பெயர் பெற்றவர் என்பதால் ‘ஜனநாயகன்’ திரைப்படமும் அது போன்ற ஒரு படமாக இருக்கும் என்று எதிர்பார்க்கப்படுகிறது.

மேலும் விஜய் இந்த படத்திற்கு பின்னர் முழு நேர அரசியலில் ஈடுபட உள்ளதால் படத்தின் மீதான எதிர்பார்ப்பு அதிகமாக உள்ளது.

இந்தப் படத்தில் நடிகர் விஜய் உடன் பூஜா ஹெக்டே, பாபி தியோல், மமீதா பைஜூ, பிரியாமணி, ஸ்ருதிஹாசன், நரேன், கௌதம் வாசுதேவ் மேனன், பிரகாஷ்ராஜ், வரலட்சுமி சரத்குமார் உள்ளிட்ட பல முன்னணி நடிகர்கள் நடித்து வருகின்றனர்.

‘ஜனநாயகன்’ படத்தின் இறுதி கட்ட படப்பிடிப்பு நடந்து முடிந்துள்ளதாக கூறப்படுகிறது. இந்த படம் 2026 ஆம் ஆண்டு பொங்கல் பண்டிகையை முன்னிட்டு ஜனவரி 9-ம் தேதி வெளியாகும் என்று அறிவிக்கப்பட்டுள்ளது.

இந்த நிலையில் சில வாரங்களுக்கு முன்பு நடிகர் விஜய் ‘ஜனநாயகன்’ படத்தின் படப்பிடிப்பை முழுமையாக முடித்து விட்டார் என்று தகவல்கள் வெளியாகி இருந்தது. அதை தொடர்ந்து தற்போது பூஜா ஹெக்டேவும் படத்தின் படப்பிடிப்புகளை முடித்திருப்பதாக தனது இன்ஸ்டாகிராம் பக்கம் மூலமாக அறிவித்திருக்கிறார்.

‘ஜனநாயகன்’ படத்தில் தனது போர்ஷன் முழுவதுமாக நிறைவடைந்து விட்டதாக அவர் இன்ஸ்டாகிராமில் பகிர்ந்து இருக்கிறார்.

வரும் ஜூன் 22ஆம் தேதி விஜயின் பிறந்தநாள் கொண்டாடப்பட இருக்கும் நிலையில் ஃபர்ஸ்ட் சிங்கிள், கிளிம்ப்ஸ் வீடியோ அல்லது வேறு ஏதாவது அப்டேட் வெளியாகும் என்று ரசிகர்கள் எதிர்பார்த்து காத்திருக்கின்றனர்.