பாலியல் வன்கொடுமை வளர்ந்து வரும் நீண்டகால பிரச்சினையாக மாறியுள்ளது!
பாலியல் வன்கொடுமைக்கான தண்டனைகள் பாதிக்கப்பட்டவர்களுக்கு மட்டுமல்ல, ஒட்டுமொத்த சமூகத்திற்கும் நீண்டகால விளைவுகளை ஏற்படுத்தும் என்று நீதிமன்றம் வலியுறுத்தியுள்ளது.
கடந்த 2001 ஆம் ஆண்டு சிலாபத்தை சேர்ந்த 15 வயதான சிறுமி ஒருவர் 27 வயதான திருமணமான ஒருவரால் பாலியல் துஷ்பிரயோத்திற்கு உட்படுத்தப்பட்டார்.
சந்தேகநபர் மீது 03 குற்றச்சாட்டுகள் சுமத்தப்பட்ட நிலையில், அவர் தனது குற்றங்களை ஒப்புக்கொண்டார்.
இதனைத் தொடர்ந்து நீதிமன்றம் அவருக்கு 18 ஆண்டுகள் கடுங்காவல் சிறைதண்டனை விதித்து தீர்ப்பளித்தது. இந்நிலையில் இந்த தீர்ப்பை எதிர்த்து அவர் மேல் முறையீட்டு நீதிமன்றத்தில் வழக்கு தாக்கல் செய்துள்ளார்.
குறித்த வழக்கு மேல்முறையீட்டு நீதிமன்ற நீதிபதி அமல் ரணராஜா, நீதிபதி சசி மகேந்திரன் முன்னிலையில் விசாரணைக்கு எடுத்துக்கொள்ளப்பட்டது. இதனை விசாரித்த நீதிபதிகள் குற்றவாளியின் மேல்முறையீட்டை தள்ளுபடி செய்து உத்தரவு பிறப்பித்தனர்.
அத்துடன் இலங்கையில் பாலியல் வன்கொடுமை ஒரு பரவலான மற்றும் வளர்ந்து வரும் பிரச்சினையாக உள்ளது என்றும், இது நாட்டின் சமூக கட்டமைப்பில் நீண்ட நிழலை ஏற்படுத்துகிறது என்றும் தெரிவித்துள்ளனர்.
பாலியல் வன்கொடுமை “வெறும் ஒரு குற்றம் அல்ல, ஆனால் சமூகத்தின் இதயத்தில் தாக்கும் ஒரு சாபக்கேடு” என்று குறிப்பிட்டுள்ளனர்.
இந்த குற்றம் நாட்டின் சமூக கட்டமைப்பில் தொடர்ந்து ஒரு இருண்ட நிழலைப் போட்டு வருகிறது என்று வலியுறுத்தியதுடன், பாலியல் வன்கொடுமை பாதிக்கப்பட்டவர்களுக்கு ஆழமான உளவியல் காயங்களை ஏற்படுத்துகிறது மற்றும் பெண்கள் மத்தியில் அச்சத்தை ஏற்படுத்துகிறது எனவும் தெரிவித்துள்ளனர்.
இதனால் நீதி அமைப்பு மற்றும் சமூகம் அனைவருக்கும் பாதுகாப்பு, கண்ணியம் மற்றும் மரியாதையைப் பாதுகாக்க தீர்க்கமாக செயல்பட வேண்டியது அவசியம் என்று நீதிமன்றம் குறிப்பிட்டது.
கடுமையான பாலியல் குற்றங்களைச் செய்த குற்றவாளிகள் சரியான முறையில் கையாளப்படுவதை உறுதி செய்வது நீதியை நிலைநிறுத்துவதற்கும் எதிர்கால குற்றங்களைத் தடுப்பதற்கும் மிக முக்கியமானது எனவும் நீதிமன்றம் வலியுறுத்தியது.
அந்த நேரத்தில் மைனராக இருந்த பாதிக்கப்பட்டவர், ஆழ்ந்த பாதிப்பு மற்றும் ஆயத்தமில்லாத வயதில் பிரசவ சுமை உட்பட கடுமையான உடல் மற்றும் உளவியல் அதிர்ச்சியைச் சந்தித்துள்ளார் என்று நீதிமன்றம் தெரிவித்துள்ளது.
