ஒரு சொட்டு எண்ணெயை கூட வெளியேற்ற முடியாது : மிரட்டும் ஈரான் – ஹோர்முஸால் வந்த சோதனை

ஈரான் மற்றும் ஹோர்முஸ் நீரிணை வழியாகச் செல்லும் கப்பல்களுக்கு அச்சுறுத்தல் விடுத்துள்ள நிலையில், உலகளாவிய எரிசக்தி சந்தையில் பதற்றம் அதிகரித்துள்ளது.

ஒரு சொட்டு எண்ணெய் கூட இப்பகுதியை விட்டு வெளியேற விடமாட்டோம்” என ஈரானிய புரட்சிகர காவல்படையின் மூத்த
ஆலோசகர் பிரிகேடியர் ஜெனரல் சர்தார் இப்ராகிம் ஜப்பாரி (Sardar Ebrahim Jabbari) எச்சரித்துள்ளார்.

உலகின் எண்ணெய் மற்றும் எரிவாயு வர்த்தகத்தின் சுமார் 20% இந்த குறுகிய கடல் பாதை வழியாகச் செல்கிறது.
அமெரிக்க எரிசக்தி தகவல் நிர்வாகத்தின் மதிப்பீட்டின்படி, நாளொன்றுக்கு சுமார் 20 மில்லியன் பீப்பாய் கச்சா எண்ணெய் இங்கு கடத்தப்படுகிறது.
ஆண்டுக்கு கிட்டத்தட்ட 600 பில்லியன் டாலர் மதிப்பிலான எரிசக்தி வர்த்தகம் இந்த நீரிணையைச் சார்ந்துள்ளது.

அமெரிக்கா மற்றும் இஸ்ரேல் மேற்கொண்ட தாக்குதல்களுக்கு பதிலடி அளிப்பதாக ஈரான் கூறியுள்ள நிலையில், ஏற்கனவே எண்ணெய் விலைகள் உயர்வைச் சந்தித்துள்ளன.

ஹோர்முஸ் நீரிணை அருகே கப்பல்கள் தாக்கப்பட்டதைத் தொடர்ந்து, உலகளாவிய அளவுகோலான பிரெண்ட் கச்சா
எண்ணெய் விலை பீப்பாய்க்கு 82 டொலரை எட்டியது. கடலில் சுமார் 150 டேங்கர்கள் சிக்கியுள்ளன என தகவல்கள் தெரிவிக்கின்றன.

இந்த நீரிணை வடக்கில் ஈரான், தெற்கில் ஓமன் மற்றும் ஐக்கிய அரபு அமீரகம் ஆகிய நாடுகளுக்கு இடையில் அமைந்துள்ளது.
உலகின் மிகப்பெரிய எண்ணெய் கப்பல்களும் இப்பாதையை பயன்படுத்துகின்றன. ஈராக், குவைட், கட்டார், சவுதி அரேபியா
உள்ளிட்ட வளைகுடா நாடுகளின் எண்ணெய் ஏற்றுமதிக்கும் இது முக்கிய நெரிசல் புள்ளியாகும்.

நீரிணை மூடப்பட்டால், ஆசிய பொருளாதாரங்கள் கடுமையாக பாதிக்கப்படும் அபாயம் உள்ளது. குறிப்பாக சீனா, இந்தியா, ஜப்பான் போன்ற நாடுகள் இப்பகுதியிலிருந்து அதிகளவில் எண்ணெய் இறக்குமதி செய்கின்றன. 2022 ஆம் ஆண்டில், இந்த நீரிணையை விட்டு வெளியேறிய கச்சா எண்ணெயின் 80% க்கும் அதிகமான பகுதி ஆசிய நாடுகளுக்குச் சென்றதாக மதிப்பிடப்பட்டுள்ளது.

நிபுணர்களின் கூற்றுப்படி, நீரிணையை நடைமுறையில் முடக்க ஈரான் வேகமான தாக்குதல் படகுகள், கண்ணிவெடிகள் மற்றும் ஏவுகணைகளை பயன்படுத்தக்கூடும். ஆனால், இது அமெரிக்கா உள்ளிட்ட நாடுகளின் இராணுவ தலையீட்டை தூண்டும் அபாயமும் உள்ளது.

மாற்று குழாய் வழிகள் இருந்தாலும், அவை முழுமையான இழப்பை ஈடுசெய்ய முடியாது என எச்சரிக்கப்படுகிறது.
ஹோர்முஸ் நீரிணை நீண்ட காலத்திற்கு மூடப்பட்டால், உலகளாவிய எரிசக்தி விநியோகத்தில் நாளொன்றுக்கு 8–10 மில்லியன் பீப்பாய் வரை குறைவு ஏற்படக்கூடும்.

இதனால், உலக பொருளாதாரத்தில் விலைவாசி உயர்வு மற்றும் வர்த்தக இடையூறு மேலும் தீவிரமடையும் அபாயம் நிலவுகிறது.