கென்ட் பாடசாலைகளில் தடுப்பூசி விரிவாக்கம் – 11ஆம் வகுப்பு மாணவர்களுக்கும் வழங்க தீர்மானம்

இங்கிலாந்தின் கென்ட் மாகாணத்தில் உள்ள பாடசாலைகளில், மெனிஞ்சைடிஸ் பி (Meningitis B) தடுப்பூசி திட்டம் மேலும் விரிவுபடுத்தப்படவுள்ளதாக சுகாதார அதிகாரிகள் தெரிவித்துள்ளனர்.

ஏற்கனவே மூத்த மாணவர்களுக்கு வழங்கப்பட்ட இந்த தடுப்பூசி, தற்போது 15 மற்றும் 16 வயதுடைய 11 ஆம் வகுப்பு மாணவர்களுக்கும் நீட்டிக்கப்பட உள்ளது.

இது “நீண்டகால பாதுகாப்பை உறுதி செய்யும்” முன்னெச்சரிக்கை நடவடிக்கையாகும் என பிரித்தானிய சுகாதார மற்றும் பாதுகாப்பு முகமை (UKHSA) தெரிவித்துள்ளது.

இந்த மாத தொடக்கத்தில் கென்ட்டில் ஏற்பட்ட நோய்ப் பரவலில் இரண்டு பேர் உயிரிழந்த நிலையில், கடந்த மூன்று நாட்களாக புதிய பாதிப்புகள் எதுவும் பதிவாகவில்லை.

உறுதி செய்யப்பட்ட பாதிப்புகள் 20 ஆகவே நீடிக்கின்றன. மேலும் மூன்று பாதிப்புகள் விசாரணையில் உள்ளன.

முன்னதாக 29 ஆக இருந்த மொத்த உறுதி செய்யப்பட்ட அல்லது சந்தேகிக்கப்படும் பாதிப்புகள் தற்போது 23 ஆகக் குறைந்துள்ளதாகவும் தெரிவிக்கப்பட்டுள்ளது. இதில் நான்கு பேர் தீவிர சிகிச்சைப் பிரிவில் சிகிச்சை பெற்று வருகின்றனர்.

இதுவரை 10,600 க்கும் மேற்பட்டோருக்கு தடுப்பூசி செலுத்தப்பட்டுள்ளதுடன்,
13,300 க்கும் மேற்பட்ட ஆன்டிபயாடிக் மருந்துகளும் வழங்கப்பட்டுள்ளதாக UKHSA உறுதிப்படுத்தியுள்ளது.

பாதிக்கப்பட்ட பாடசாலைகளில் உள்ள 11 ஆம் வகுப்பு மாணவர்களுக்கு தடுப்பூசி வழங்கப்படும் என்றும்,
மேலதிக தகவல்கள் வெளியாகும் வரை தடுப்பூசி மையங்களுக்கு நேரடியாகச் செல்ல வேண்டாம் என
மாணவர்களுக்கு அறிவுறுத்தப்பட்டுள்ளது.