நோபல் பரிசு அமெரிக்காவிற்கு இல்லை என்றால் உலக அமைதி பற்றி ஏன் கவலைப்பட வேண்டும்?

டொனால்ட் ட்ரம்ப் கிரீன்லாந்தை கையகப்படுத்துவதற்கான தனது முயற்சிகளை தீவிரப்படுத்தியுள்ள நிலையில், ஐரோப்பிய நாடுகள் மீது 100 சதவீதம் வரி விதிக்கவுள்ளதாகவும் எச்சரித்துள்ளார்.

மேலும் இந்த உந்துதலை அமைதிக்கான நோபல் பரிசை வெல்லத் தவறியதோடு தொடர்புபடுத்தி பேசியுள்ளார்.

நோர்வேயின் பிரதமர் ஜோனாஸ் காஹர் ஸ்டோயருக்கு (Jonas Gahr Stoere) அனுப்பிய குறுஞ்செய்தியில், 08 நாடுகளின் போரை நிறுத்திய தனக்கு நோபல் பரிசு வழங்கப்படவில்லை என்பதை சுட்டிக்காட்டியுள்ளார்.

அமைதிக்கான நோபல் பரிசை வழங்க வேண்டாம் என்று முடிவு செய்ததைக் கருத்தில் கொண்டு, அமைதியைப் பற்றி மட்டுமே சிந்திக்க வேண்டிய கடமையை நான் உணரவில்லை என்றும், இனி அமெரிக்காவிற்கு எது நல்லதோ அதைப் பற்றி மட்டுமே சிந்திப்பதாகவும் குறிப்பிட்டுள்ளார்.

இதேவேளை  ட்ரம்ப் மீண்டும் பதவிக்கு வந்ததிலிருந்து எட்டு போர்களை முடித்துவிட்டதாகவும், நோபல் பரிசுக்கு தகுதியானவர் என்று நம்புவதாகவும் கூறுகிறார். மாதத்திற்கு சராசரியாக ஒரு மோதல் தீர்க்கப்பட்டதாகக் கூறுகிறார்.

2025 அக்டோபரில் இஸ்ரேலுக்கும் ஹமாஸுக்கும் இடையே ஒரு போர் நிறுத்தத்திற்கு அவர் மத்தியஸ்தம் செய்தார், ஆனால் தொடர்ச்சியான உயிரிழப்புகள் மற்றும் ஹமாஸ் மீண்டும் ஒன்றிணைவதால் இந்த ஒப்பந்தம் “பெயரளவில் மட்டுமே போர் நிறுத்தம்” என்று விமர்சிக்கப்பட்டது.

கம்போடியா மற்றும் தாய்லாந்து, இந்தியா மற்றும் பாகிஸ்தான் இடையேயான போர் நிறுத்தங்களுக்கு தலைமை தாங்கியுள்ளார்.

ருவாண்டா மற்றும் காங்கோ ஜனநாயகக் குடியரசு, ஆர்மீனியா மற்றும் அஜர்பைஜான் ஆகிய நாடுகளுக்கு இடையிலான மோதல்களில் மத்தியஸ்தம் வகித்தார். இருப்பினும் இந்த முயற்சிகள் முழுமையாக செயல்படுத்தப்படவில்லை அல்லது இன்னும் ஒப்புதல் தேவைப்படும் ஒப்பந்தங்களுக்கு வழிவகுத்துள்ளன.

எகிப்து மற்றும் எத்தியோப்பியா, கொசோவோ மற்றும் செர்பியா இடையேயான தகராறுகளைத் தீர்ப்பதற்கும், இஸ்ரேல் மற்றும் ஈரான் இடையேயான போர் தவிர்க்கப்பட்டதற்கும் ட்ரம்பே காரணம் என வெள்ளை மாளிகை கூறுகின்றமை குறிப்பிடத்தக்கது.