நீண்ட போரை எதிர்கொள்ள தயாராக வேண்டும் – ஜென்ஸ் ஸ்டோல்டன்பெர்க்!
உக்ரைனில் போர் விரைவில் முடிவுக்கு வரும் என்று எதிர்பார்க்க முடியாது, எனவே நீண்ட போரை எதிர்கொள்ள தயாராக இருக்க வேண்டும் என நேட்டோ அமைப்பின் தலைவர் ஜென்ஸ் ஸ்டோல்டன்பெர்க் கூறியுள்ளார்.
ஜேர்மன் செய்தித்தாள் ஒன்றிற்கு அவர் அளித்த பேட்டியில், அனைத்து போர்களும் ஆரம்பத்தில் எதிர்பார்த்ததை விட நீண்ட காலம் நீடித்ததாக குறிப்பிட்டார்.
பிப்ரவரி 2022 இல், ரஷ்ய துருப்புக்கள் உக்ரைனை ஆக்கிரமித்தபோது, பல தசாப்தங்களுக்குப் பிறகு ஐரோப்பா மீண்டும் போர் சூழலை எதிர்கொண்டுள்ளது.
கடந்த ஜூன் மாதம் தொடங்கிய எதிர்த்தாக்குதல் நடவடிக்கையில், தெற்கு மற்றும் கிழக்கு போர் முனைகளில் உக்ரேனியப் படைகள் ஓரளவு முன்னேற்றம் கண்டன, ஆனால் அவர்களால் இதுவரை குறிப்பிடத்தக்க வெற்றியைப் பெற முடியவில்லை.
இந்நிலையில் இது குறித்து செய்திதாள் ஒன்றுக்கு கருத்து வெளியிட்ட ஜென்ஸ் ஸ்டோல்டன்பெர்க், அதிபர் ஜெலென்ஸ்கியும், உக்ரைன் ராணுவமும் சண்டையிடுவதை நிறுத்தினால், உக்ரைன் அரசின் இருப்பை இனி எதிர்பார்க்க முடியாது எனக் கூறியுள்ளார்.
அதிபர் புடினும் ரஷ்ய ராணுவமும் ஆயுதங்களைக் கீழே போட்டால், நாம் அமைதி காக்க முடியும் என்று வலியுறுத்திய அவர், உக்ரைன் நேட்டோவில் சேருவது நிச்சயம் நடக்கும் எனவும் தெரிவித்துள்ளார்.
(Visited 3 times, 1 visits today)
