நாளை முதல் 24 மணித்தியால வேலைநிறுத்தப் போராட்டம்: அரச மருத்துவ அதிகாரிகள் சங்கம்

அரச மருத்துவ அதிகாரிகள் சங்கம் (GMOA) நாளை (நவம்பர் 02) முதல் மாகாண மட்டத்தில் 24 மணித்தியால வேலைநிறுத்தப் போராட்டத்தை நடத்தத் திட்டமிட்டுள்ளதாக தெரிவித்துள்ளது.

இன்று இடம்பெற்ற ஊடகவியலாளர் சந்திப்பின் போது அரச மருத்துவ அதிகாரிகள் சங்கம் செயலாளர் டொக்டர் ஹரித அலுத்கே இதனை தெரிவித்துள்ளார். .

வேலைநிறுத்தங்கள் காலை 8 மணிக்குத் தொடங்கும் மற்றும் மறுநாள் காலை 8 மணி வரை தொடரும். எவ்வாறாயினும், இந்த தொழிற்சங்க நடவடிக்கையினால் மகப்பேறு, புற்றுநோய், குழந்தைகள் மற்றும் சிறுநீரகவியல் மருத்துவமனைகள் மற்றும் முப்படை மருத்துவமனைகளின் செயல்பாடுகள் பாதிக்கப்படாது என GMOA உறுதியளித்துள்ளது.

இதன்படி, ஊவா மாகாணத்திலுள்ள அனைத்து அரச வைத்தியசாலைகளிலும் மருத்துவ அதிகாரிகள் நாளை அடையாள பணிப்புறக்கணிப்பில் ஈடுபடவுள்ள அதேவேளை, வடக்கு, வடமேல் மற்றும் சப்ரகமுவ மாகாணங்களில் முறையே நவம்பர் 03, 06, மற்றும் 07 ஆம் திகதிகளில் மருத்துவ அதிகாரிகள் அடையாள பணிப்புறக்கணிப்பை நடத்த திட்டமிட்டுள்ளனர்.

நவம்பர் 08 ஆம் தேதி, மத்திய மற்றும் கிழக்கு மாகாணங்களில் உள்ள மருத்துவமனைகளில் டோக்கன் வேலைநிறுத்தங்கள் எதிர்பார்க்கப்படுகின்றன.

நவம்பர் 09 ஆம் திகதி தென் மற்றும் வடமத்திய மாகாணங்களில் உள்ள வைத்திய அதிகாரிகள் தொடர் அடையாள வேலைநிறுத்தப் போராட்டத்தில் கலந்துகொள்வார்கள், அதனைத் தொடர்ந்து நவம்பர் 10 ஆம் திகதி மேல் மாகாணத்தில் வைத்திய அதிகாரிகள் ஈடுபடுவார்கள்.

தாம் எழுப்பிய பிரச்சினைகளை கண்டும் காணாத வகையில் இருக்கும் அதிகாரிகள், இந்த அடையாள வேலைநிறுத்தங்களால் நோயாளர்கள் எதிர்நோக்கும் அசௌகரியங்களுக்கு பொறுப்பேற்க வேண்டுமென GMOA தெரிவித்துள்ளது.

அடையாள வேலைநிறுத்தங்களுக்கு மேலதிகமாக, குறிப்பிட்ட தேதிகளில் ஒவ்வொரு மாகாணத்திலும் போராட்டமும் நடத்த திட்டமிடப்பட்டுள்ளது.

அதிகாரிகள் தமது பிரச்சினைகளை உதாசீனப்படுத்தினால், நாடளாவிய ரீதியில் தொடர் நடவடிக்கையை மேற்கொள்ளவுள்ளதாக GMOA தெரிவித்துள்ளது.