நடிகர்கள் அரசியலுக்கு வருவது சாபக்கேடு – திருமாவளவன்!

நடிகர் விஜய் அரசியலுக்கு வரவுள்ளதாக அண்மைக்காலமாக செய்திகள் வெளியாகியிருந்த நிலையில், இதனை ஊர்ஜிதப்படுத்தும் வகையில், விஜயின் செயற்பாடுகள் அமைந்திருந்தது.

குறிப்பாக தமிழ்நாட்டில் 234 தொகுதிகளிலும் 10 மற்றும் 12-ம் வகுப்பு பொதுத்தேர்வில் முதல் 3 இடங்களைப் பிடித்த மாணவ,  மாணவியருக்கு ஊக்கத்தொகை வழங்கிய விவகாரம் சூடுபிடிக்க ஆரம்பித்துள்ளது.

இந்நிலையில், இது குறித்து விடுதலை சிறுத்தைகள் கட்சி தலைவர் தொல்.திருமாவளவனிடம் கேட்கப்பட்டது.

இதற்கு பதிலளித்த அவர்,  பொது வாழ்க்கைக்கு வரக் கூடியவர்கள் எந்த பருவத்தில் வேண்டுமானாலும் வரலாம்.

பொதுவாக சினிமாவில் இருக்கும் அனைவரும் சினிமா புகழ் இருந்தால் போதும் முதலமைச்சர் ஆகிவிடலாம் என்ற எண்ணத்தோடு அரசியலுக்கு வருகின்றனர். தமிழ்நாட்டில் மட்டும் தான் இந்த சாபக்கேடு இருக்கிறது.

இந்தியாவின் மற்ற மாநிலங்களில் திரையுலகினர் அவர்களுடைய வேலையை மட்டுமே செய்கின்றனர். தமிழ்நாட்டில் மட்டும் தான் சினிமாவில் இருப்பவர்கள் எல்லா வேலையும் முடிந்து மார்கெட் போனதும் அரசியலுக்கு வரலாம் என்று நினைக்கிறார்கள்.

அரசியலுக்கு வந்து எளிய முறையில் மக்களை கவர்ந்து விடலாம் என்று நினைக்கிறார்கள். அந்த மாதிரியான எண்ணத்தோடு இல்லாமல்,  தொண்டு உள்ளத்தோடு விஜய் அரசியலுக்கு வந்தால் அவரை நாம் வரவேற்க கடமைப்பட்டிருக்கிறோம்” எனத் தெரிவித்துள்ளார்.