இணைய முடக்கத்தை நீக்க ஈரான் தீர்மானம்

ஈரானில் கடந்த டிசம்பர் மாதம் முதல் முன்னெடுக்கப்பட்ட அரசுக்கு எதிரான போராட்டங்களை அடக்குவதற்காக அந்நாட்டு அரசாங்கம் மேற்கொண்ட பாரிய இராணுவ நடவடிக்கை மற்றும் இணைய முடக்கம் குறித்து தகவல்கள் வெளியாகியுள்ளன.

இப்போராட்டங்களின் போது பாதுகாப்புப் படையினர் மேற்கொண்ட தாக்குதல்களில் சுமார் 5,000-க்கும் மேற்பட்டோர் உயிரிழந்துள்ளதாக ராய்ட்டர்ஸ் (Reuters) செய்தி நிறுவனம் தெரிவித்துள்ளது.

இதில் சுமார் 500 பாதுகாப்புப் படை உறுப்பினர்களும் அடங்குவர் என்பதுடன், ஈரானின் வடமேற்கே உள்ள குர்திஷ் இனத்தவர்கள் வாழும் பகுதிகளில் மிக மோசமான மோதல்கள் நிகழ்ந்துள்ளன.

இந்தச் சூழலில், கடந்த ஞாயிற்றுக்கிழமை இரவு ஈரானின் அரச தொலைக்காட்சியில் ஹேக்கர்கள் ஊடுருவி, அமெரிக்க அதிபர் டொனால்ட் ட்ரம்ப் மற்றும் ஈரானின் கடைசி மன்னரின் மகனான இளவரசர் ரேசா பஹ்லவி ஆகியோரின் புரட்சிக்கு அழைப்பு விடுக்கும் உரைகளை ஒளிபரப்பியுள்ளனர்.

இது அரசாங்கத்தின் கட்டுப்பாட்டில் ஏற்பட்டுள்ள பலவீனத்தைக் காட்டுவதாக ஆய்வாளர்கள் கருதுகின்றனர்.

இந்நிலையில், ஈரானின் நாடாளுமன்ற தேசிய பாதுகாப்புக் குழுவின் தலைவர் இப்ராகிம் அசிசி (Ebrahim Azizi), பாதுகாப்புச் சூழல் சீரடைந்ததும் வரும் நாட்களில் இணைய முடக்கம் நீக்கப்பட வாய்ப்புள்ளதாகத் தெரிவித்துள்ளார்.

சுமார் 24,000-க்கும் மேற்பட்டோர் கைது செய்யப்பட்டுள்ளதாகவும், ஆயிரக்கணக்கானோர் கண் மற்றும் உடல் உறுப்புகளில் பலத்த காயமடைந்துள்ளதாகவும் மனித உரிமை அமைப்புகள் கவலை வெளியிட்டுள்ளன.