இரண்டு ஆண்டுகளுக்கு முன்பு ஹமாஸ் தாக்குதலில் காதலியை இழந்த இஸ்ரேலிய நபர் தற்கொலை

இஸ்ரேலில் அக்டோபர் 7, 2023 அன்று நடந்த இசை விழா மீதான ஹமாஸ் தாக்குதலில் இருந்து தப்பிய ஒரு இஸ்ரேலிய நபர், தாக்குதலின் இரண்டாவது ஆண்டு நினைவு தினத்திற்கு சில நாட்களுக்குப் பிறகு தற்கொலை செய்து கொண்டுள்ளார்.

28 வயதான ரோய் ஷாலேவ், தனது காதலி 25 வயது மாபல் ஆடம் (Mapal Adam) மற்றும் அவரது நண்பர் ஹிலி சாலமனை (Hili Solomon) இரண்டு ஆண்டுகளுக்கு முன்பு நடந்த தாக்குதலில் இழந்தார்.

இந்நிலையில், இஸ்ரேலின் நெதன்யா அருகே ஒரு நெடுஞ்சாலையில் எரியும் காரில் ரோய் ஷாலேவ் இறந்து கிடந்ததாக தி ஜெருசலேம் போஸ்ட் (The Jerusalem Post) செய்தி வெளியிட்டுள்ளது.

இறப்பதற்கு முன்பு, ஷாலேவ் இன்ஸ்டாகிராமில், “நான் உண்மையிலேயே வருந்துகிறேன். இந்த வலியை இனி என்னால் தாங்க முடியாது, என் வாழ்க்கையில் ஒருபோதும் இவ்வளவு வலியையும் துன்பத்தையும் உணர்ந்ததில்லை, இந்த துன்பம் முடிவுக்கு வர வேண்டும் என்று நான் விரும்புகிறேன். நான் உயிருடன் இருக்கிறேன் ஆனால் நான் ஏற்கனவே இறந்துவிட்டேன்.” என்று பதிவிட்டுள்ளார்.

அக்டோபர் 7, 2023 அன்று, பயங்கரவாதிகள் காசா எல்லைக்குள் ஊடுருவி சுமார் 1,200 பேரைக் கொன்றனர். அந்த தாக்குதலில் அவரது காதலியும் நெருங்கிய நண்பரும் கொல்லப்பட்டனர். ஆனால் ஷாலேவ் சிறு காயங்களுடன் உயிர் தப்பினார்.

இசை விழாவில் உயிர் பிழைத்தவர்கள் மற்றும் பாதிக்கப்பட்டவர்களின் குடும்பங்களைப் பிரதிநிதித்துவப்படுத்தும் நோவா பழங்குடி சமூக அமைப்பு, ஷாலேவின் மரணத்திற்கு இரங்கல் தெரிவித்துள்ளது.

“ரோய் ஷாலே சமூகத்தின் முதுகெலும்பாக இருந்தார், அவரது மரணம் எங்களுக்கு நினைத்துப் பார்க்க முடியாத செய்தி” என்று குழு ஒரு பேஸ்புக் அறிக்கையில் தெரிவித்துள்ளது.